შრომის, ჯანმრთელობისა და სოციალური დაცვის სამინიტროს 2011 წლის სახელმწიფო ბიუჯეტიდან 85 მილიონ 896,8 ათასი ლარი დაემატება.
როგორც დღეს ფინანსთა მინისტრის პირველმა მოადგილემ პაპუნა პეტრიაშვილმა ევროპასთან ინტეგრაციის, საგარეო ურთიერთობათა და დიასპორის საკითხთა კომიტეტების გაერთიანებულ სხდომაზე განაცხადა, აღნიშნული თანხიდან 55 მილიონი ლარი ასაკის და პირველი ჯგუფის ინვალიდობის პენსიონერებისთვის პენსიის 100 ლარამდე გაზრდას მოხმარდება.
"2011 წლის სახელმწიფო ბიუჯეტში შემოსავლების ნაწილი 348.8 მილიონი ლარით იზრდება. რაც შეეხება ხარჯების ნაწილს, აქედან მხოლოდ ნაწილი 230 მილიონი ლარია გაწერილი, ხოლო დანარჩენი 118 მილიონი აკუმილირდება ხაზინის ერთიან ანგარიშზე და წლის განმავლობაში საშუალებას მოგვცემს დავზოგოთ ხარჯები, შევამციროთ დეფიციტი", - განმარტა პეტრიაშვილმა.
მისივე თქმით, ხარჯვით ნაწილში გათვალისწინებულია პრეზიდენტის ინიციატივა პენსიების მატებასთან დაკავშირებით და 230 მილიონი ლარიდან 55 მილიონი ჯანდაცვის სამინისტროს აღნიშნული პროგრამის განსახორციელებლად გადაეცემა.
ამასთან, პეტრიაშვილის განმარტებით, ელექტროენერგიის და სასურსათო ვაუჩერებისთვის თანხები ჯანდაცვის სამინისტროს დეფიციტური პროგრამებიდან დაიხარჯა და მის შესავსებად სამინიტროს 30 მილიონი ლარი დაემატება, ასევე სამინისტროს ტუბერკულოზის რეგიონალური პროგრამისთვის 896,8 ათასი ლარი გამოეყო სახელმწიფო ბიუჯეტიდან.