დღეს, 29 მარტს 11:00 საათზე, საქართველოს ატლანტიკური ხელშეკრულების ახალგაზრდული ასოციაცია (Youth Atlantic Treaty Association), საქართველოს პარლამენტის საგარეო ურთიერთობათა კომიტეთთან, საგარეო საქმეთა სამინისტროსთან და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატთან თანამშრომლობით, ატარებს ჩრდილოატლანტიკურ ალიანსთან დაკავშირებული სტუდენტური დებატების ინგლისურენოვანი კონკურსის დასკვნით ეტაპს.
სტუდენტური დებატების თემატიკა მოიცავს ჩრდილო ატლანტიკურ ალიანსთან დაკავშირებულ შემდეგ საკითხებს: ნატოს რეგიონალური პოლიტიკა, უსაფრთხოების ახალი კონცეფცია, სარაკეტო თავდაცვდა და ISAF-ის სამშვიდობო ოპერაცია.
კონკურსის შედეგად გამოვლენილი გამარჯვებულები სტაჟირებას გაივლიან საქართველოს პარლამენტში, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატში და საგარეო საქმეთა სამინისტროში.
ღონისძიებას დაესწრება საგარეო საქმეთა სამინისტროს, საქართველოს პარლამენტის საგარეო ურთიერთობათა კომიტეტის, საქართველოში წარმოდგენილი დიპლომატიური კორპუსის, ნატო საქართველოს პროფესიული განვითარების პროგრამის, ნატოს სამოკავშირეო ოფისისა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის წარმომადგენლები.