საქართველოს შრომის, ჯანმრთელობისა და სოციალური დაცვის მინისტრ სანდრო ურუშაძის განცხადებით, პენსიის 100 ლარამდე გაზრდა არის კიდევ ერთი ნაბიჯი მთავრობის გეგმისა, რომ მომავალი წლიდან საპენსიო პაკეტის საერთო ღირებულებამ 100 დოლარი შეადგინოს.
ურუშაძის მტკიცებით, ბოლო წლების განმავლობაში პენსიის ზრდას სტაბილური ხასიათი აქვს და სახელმწიფო პენსიის საშუალო ოდენობა 2004 წლიდან დღემდე 6-ჯერ და მეტად არის გაზრდილი.
"პენსიის ზრდა არ შეჩერებულა რუსეთის აგრესიისა და ეკონომიკური კრიზისის ფონზეც. გასათვალისწინებელია ის სოციალური დანამატებიც, რომელიც პენსიონერთა დიდ ნაწილს პენსიასთან ერთად გააჩნია. რასაკვირველია პენსია მცირეა და ბოლო წლებში ძალიან ძნელი იყო პენსიის ისეთი მყარი ზრდა. პენსიის ოდენობა დიდად არის დამოკიდებული ეკონომიკურ განვითარებაზე. 2008-2009, მიუხედავად უმძიმესი წლებისა, საქართველო იყო იმ იშვიათი ქვეყნების რიგში, რომელსაც არც შეუმცირებია და ვალდებულებაც დაიტოვა სოციალური გასაცემლების შეუწყვეტელ და მუდმივ ზრდასთან დაკავშირებით. ყოველი მესამე პენსიონერი სამწუხაროდ დღეს სიღარიბის ზღვარს ქვემოთ არის და ღებულობს 30 ლარის დანამატს ძირითად პენსიასთან დაკავშირებით. ასევე, ყველა პენსიონერი რომელიც არის რეგისტრირებული ამ ბაზაში დამატებით ღებულობს სამედიცინო დაზღვევის პაკეტსაც", - განმარტავს ჯანდაცვის მინისტრი.
