ოპოზიციონრები იემენის პრეზიდენტის გადადგომას დაუყოვნებლივ მოითხოვენ. ამის შესახებ ტელეკომპანია "ალ ჯაზირა" იტყობინება.
ოპოზიციონერთა თქმით, ალი აბდულა სალეხის გადადგომას ისინი წლის ბოლომდე ვერ დაელოდებიან.
ოპოზიციური კოალიციის მეთაურმა იასინ ნომანმა წლის ბოლომდე იემენის პრეზიდენტის ხელისუფლებაში დარჩენის წინადადება "ცარიელ სიტყვებად" მოიხსენია. ნომანის თქმით, იგი ამ პირობებს არ მიიღებს და სალეხის რეჟიმთან დიალოგს არ დათანხმდება.
25 მარტი ოპოზიციონრებმა "გადადგომის პარასკევად" მოიხსენიეს. ისინი იმედოვნებენ, რომ სწორედ დღევანდელ დღეს პრეზიდენტის გადადგომის მოთხოვნით ქუჩებში ასობით ათასი ადამიანი გამოვა.
ასეთი განცხადებების მიუხედავად, იემენის ქალაქებში სამთავრობო ძალებსა და ოპოზიციის მხარეს გადასულ სამხედროებს შორის შეტაკებები კვლავაც გრძელდება.
მანიფესტანტებს მხარს უჭერს გენერალი ალი მოხსენიც, რომელმაც მის დაქვემდებარებაში მყოფი სამხედროები იემენის დედაქალაქში დემონსტრანტთა დაცვის მიზნით გაგზავნა.
გენერალ მოხსენის თქმით, სალეხს თითქმის არ დარჩა არჩევანი. სალეხის მიერ საპრეზიდენტო პოსტის შენარჩუნების სურვილი გენერალმა მოხსენმა სიჯიუტედ შეაფასა.
შეგახსენებთ, 22 მარტს სალეხმა 2011 წლის ბოლომდე თანამდებობის დატოვების შესახებ მზადყოფნა გამოთქვა. მისი თქმით, იგი საკუთარ მმართველობას სპეციალურად შექმნილ სამხედრო საბჭოს გადასცემდა.
სალეხის გადადგომის მოთხოვნით, იემენში საპროტესტო აქციები მიმდინარე წლის იანვრის ბოლოს დაიწყო. მარტის შუა რიცხვებში საპროტესტო გამოსვლებმა მასობროვი ხასიათი მიიღო. პრეზიდენტმა საგანგებო მდგომარეობა გამოაცხადა და მთავრობა დაითხოვა, თუმცა მღელვარება არ ჩაწყნარებულა. დემონსტრანტთა მხარეს სამხედროები გადავიდნენ.