საპარლამენტო ოპოზიციის ლიდერი გიორგი თარგამაძე სიღარიბის ზღვარის აწევას ითხოვს.
როგორც დღეს, პარლამენტის პლენარულ სხდომაზე შრომის, ჯანმრთელობისა და სოციალური დაცვის მინისტრთან გამართულ დებატებზე თარგამაძემ აღნიშნა, მიუხედავად იმისა, რომ მთავრობა ცდილობს დაამტკიცოს, რომ ქვეყანაში სიღარიბე სამჯერ შემცირდა, ვითარება უფრო დამძიმებულია.
"ქვეყანაში განვითარებული ინფლაციური პრობლემების გათვალისწინებით, ხომ არ დადგა დრო საქართველოს მთავრობამ გადახედოს იმ კრიტერიუმებს, განსაკუთრებით უმწეოთა შეღავათებსა და თანხის ოდენობას, რომელიც გაიცემა მათ დასახმარებლად. გარდა ამის სიღარიბის 57 ათასიანი და 70 ათასიანი ზღვარი ავწიოთ, რადგან ინფლაციურ მაჩვენებელი საქართველოში გასულ წლებთან შედარებით 12-14% აღემატება", - მიმართა დეპუტატმა ურუშაძეს.
ამასთან, თარგამაძე დაინტერესდა ჯანდაცვის მინისტრი რამდენად სამართლიანად თვლის უმწეოთა პროგრამაში პირის მოხვედრის და სტატუსის მინიჭების შემდეგ 5-6 თვე უნდა ელოდოს სადაზღვეო პაკეტს.
"რა უნდა ქნას ამ ადამიანმა ამ თვეების განმავლობაში?", - მიმართა თარგამაძემ ანდრია ურუშაძემ.
გარდა ამისა, ოპოზიციონერი დეპუტატის თქმით, აუცილებელია პირველადი ჯანდაცვის და განათლების კუთხით არსებული პრობლემების მოგვარება, რადგან სამედიცინო უნივერსიტეტის კურსდამთავრებულებიდან სრულყოფილ განათლების მიღებას მხოლოდ 10% ახერხებს.
