კონტროლის პალატამ ექვს უმაღლეს სასწავლებელში, კერძოდ თბილისის სამედიცინო უნივერსიტეტში, აგრარულ უნივერსიტეტში, ტექნიკურ უნივერსიტეტში, ბათუმის შოთა რუსთაველის სახელმწიფო უნივერსიტეტში, სუბტროპიკული მეურნეობის უნივერსიტეტში და ლომოურის მიწათმოქმედების უნივერსიტეტში შემოწმება დაასრულა. შემოწმების შედეგად დადგინდა, რომ აღნიშნულ სასწავლებლებში თანხები გაფლანგულია.
"უმაღლესი სასწავლებლების საქმიანობის შესწავლით გამოვლინდა მრავალმხრივი სისტემური დარღვევები მათი ფინანსებისა და ქონების მართვაში. კერძოდ, მოუწესრიგებელი არის მათი ფინანსური აღრიცხვიანობა და მართვა. უნივერსიტეტები სარგებლობენ ათეულობით საბანკო ანგარიშებით სადაც უკონტროლოდ ბრუნავს საპროცენტო სარგებლის დაურიცხავად დიდი ოდენობით საბიუჯეტო სახსრები. მილიონობით ლარის კაპიტალური დანახარჯები გაწეულია უხარისხო სარემონტო სამუშაოებში, რის შედეგადაც უნივერსიტეტის სასწავლო კორპუსები და აუდიტორიები იმყოფება არასახარბიელო მდგომარეობაში. არასათანადოდ ხორციელდება და უკანონოდ გროვდება დიდი ოდენობით დებიტორული დავალიანებები. უნივერსიტეტები არ ახორციელებენ შესაბამის ღონისძიებებს დაგროვილი დავალიანებების აღმოსაფხვრელად. მეიჯარეები არ ასრულებენ უნივერსიტეტთან გაფორმებულ საიჯარო ხელშეკრულებებს, რითაც დიდი ოდენობით ფინანსური ზარალი ადგება უნივერსიტეტებს. უხეშად ირღვევა სახელმწიფო შესყიდვების კანონმდებლობა, ამის არაერთი მაგალითი ვნახეთ და საზოგადოებამ გუშინ ნახა აგრარული უნივერსიტეტის შედეგები. უნივერსიტეტებს ყავთ საჭიროზე მეტი თანამშრომლები, რაშიც განსაკუთრებით დიდ საბიუჯეტო სახსრებს ხარჯავენ. ჩატარებული აუდიტის შედეგებთან დაკავშირებით, გამოვლენილ დარღვევებთან დაკავშირებით ინფორმაცია მივაწოდეთ სამართალდამცავ ორგანოებს", - განაცხადა ბრიფინგზე კონტროლის პალატის აუდიტის დეპარტამენტის უფროსმა გიორგი ალასანიამ.
მისი თქმით, უმაღლესი განათლების მართვა კონტროლის პალატის მომავალი წლების საქმიანობის პრიორიტეტს წარმოადგენს და ამ მიმართულებით საქმიანობას აუცილებლად გაგრძელდება.
