ევროკომისია რუსეთიდან და სხვა ავტორიტარული რეჟიმებიდან მომდინარე დეზინფორმაციის საფრთხესთან საბრძოლველად დემოკრატიული მდგრადობის ცენტრის შექმნას გეგმავს. ამის შესახებ The Guardian იუწყება.
როგორც გამოცემა აღნიშნავს, ეს ნაბიჯი იქნება პასუხი „ჰიბრიდული თავდასხმების ესკალაციაზე“.
„უკრაინის წინააღმდეგ სასტიკი აგრესიის გარდა, რუსეთი ასევე ესკალაციას უწევს ჰიბრიდულ თავდასხმებს ევროპაში გავლენისთვის ბრძოლაში“, - ნათქვამია დოკუმენტში, რომელიც სრულად 12 ნოემბერს გამოქვეყნდება.
„ცრუ ნარატივების გავრცელებით, რაც ზოგჯერ მანიპულირებასა და ისტორიული ფაქტების გაყალბებას მოიცავს“, ავტორიტარული რეჟიმები „ცდილობენ დემოკრატიული სისტემების მიმართ ნდობის შელახვას“, - ხაზგასმულია დოკუმენტში.
ევროკომისია აპირებს ამ ცენტრში შეკრიბოს ექსპერტები ევროკავშირის ყველა ქვეყნიდან და სახელმწიფოდან, რომლებიც ევროკავშირში გაწევრიანებისკენ ისწრაფვიან. იდეა ეფუძნება „დემოკრატიის ფარს“, რომელიც ევროკომისიის პრეზიდენტმა ურსულა ფონ დერ ლაიენმა 2024 წელს მეორე ვადით კენჭისყრის დროს შესთავაზა.
ფონ დერ ლაიენმა ცენტრის გეგმები სექტემბერში ევროპარლამენტის წევრების წინაშე სიტყვით გამოსვლისას გამოაცხადა.
