უმრავლესობის წევრი კობა ხაბაზი სოფლის მეურნეობის მინისტრს ქართული, მთის რუხი ფუტკრის გადარჩენას სთხოვს. აღნიშნული ინიციატივით ხაბაზი პარლამენტის რიგგარეშე პლენარულ სხდომაზე სამთავრობო დებატების დროს გამოვიდა.
"კარგი იქნება, თუ ქართულ, მთის რუხ ფუტკარს გადავარჩენთ, რადგან ეს არის უნიკალური ფუტკარი. გადავარჩენთ იმ თვალსაზრისით, რომ ხდება მისი შერევა სპარსულ ფართოთათიან ფუტკართან. თითქმის ვერ ნახავთ, ყვითელი ზოლები რომ არ დაყვებოდეს ქართულ მთის ფუტკარს, რაც არ არის მისთვის ბუნებრივი", - აღნიშნა დეპუტატმა.
ხაბაზმა მთის ფუტკრისთვის დაცული ტერიტორიის შექმნა მოითხოვა, სადაც სხვა ფუტკრების "შესვლა, შეყვანა არ იქნება რეკომენდებული".
"ასეთი ბაზა სამეგრელოში იყო და იქნებ მის განვითარებაზე ვიზრუნოთ და 150 მილიონიდან მიზერული თანხა მაინც ჩავდოთ. დანარჩენს კი მეფუტკრეები მიხედავენ", - დასძინა ხაბაზმა.