"ქრისტიან-დემოკრატები" სოფლის მეურნეობის სფეროს საწარმოების მოგების გადასახადისგან 10 წლით განთავისუფლების ინიციატივით გამოდიან. ამის შესახებ პარლამენტის რიგგარეშე პლენარულ სხდომაზე სამთავრობო დებატების დროს "ქრისტიან-დემოკრატების" ლიდერმა გიორგი თარგამაძემ განაცხადა.
"მთავრობის ზეპარსიტყვიერი განცხადებებით ეკონომიკის ვერც ერთი დარგი ვერ განვითარდება. რაც არ უნდა ბევრი გვიხსენოთ, რომ ბერძნებმა საქართველოს "გეორგია" იმიტომ უწოდეს, რომ მიწათმოქმედების ქვეყანა ვართ, ამით მიწათმოქმედება ვერ განვითარდება", - დასძინა თარგამაძემ.
მისი შეფასებით, საქართველოში მიწათმოქმედების განვითარებისთვის საჭიროა კონკრეტული ეკონომიკური პოლიტიკა, მათ შორის საგადასახადო.
"თუ პრიორიტეტად აგარარულ სექტორს ვასახელებთ, მაშინ რატომ არ უნდა მივიღოთ გადაწყვეტილება საგადასახადო შეღავათზე. კონკრეტულად კი მაინტერესებს, რა აზრის ხართ მოგების გადასახადისგან 10 წლით გათავისუფლდეს ყველა საწარმო, რომელიც სოფლის მეურნეობის სფეროში საქმიანობს", - მიმართა თარგამაძემ სოფლის მეურნეობის მინისტრს.
