მთავრობა სოფლის მეურნეობის საწარმოების მოგების გადასახადისაგან 10 წლით გათავისუფლებას არ ეთანხმება. აღნიშნულის შესახებ პარლამენტში სამთავრობო დებატების დროს სოფლის მეურნეობის მინისტრმა ბაკურ კვეზერელმა "ქრისტიან-დემოკრატების" კითხვაზე პასუხისას განაცხადა.
"მოგების გადასახადისაგან გათავისუფლება, შესაძლოა, ბევრი დარგისთვის მნიშვნელოვანი იყოს, მაგრამ ამ გადასახადისაგან დარგების მიხედვით გათავისუფლების პრაქტიკა არც ერთ ქვეყანაში არ არის დანერგილი", - განმარტა კვეზერელმა.
შეგახსენებთ, რომ სამთავრობო დებატებზე "ქრისტიან-დემოკრატების" ლიდერმა გიორგი თარგამაძემ სოფლის მეურნეობის მინისტრს რეკომენდაციით მიმართა, სოფლის მეურნეობის საწარმოები მოგების გადასახადისაგან 10 წლით გაენთავისუფლებინათ.
