რეინტეგრაციის საკითხებში სახელმწიფო მინისტრის, ეკა ტყეშელაშვილის ვარაუდით, საქართველოში არსებული კონფლიქტების მოგვარებას მალე არ უნდა ველოდოთ.
"სამწუხაროდ, როცა არსებულ სიტუაციას ვაანალიზებთ, ნათელი ხდება, რომ კონფლიქტების მოგვარებას მალე არ უნდა ველოდოთ. ჩვენ ამის იმედი არ გვაქვს, თუმცა არც სკეპტიკურად უნდა შევხედოთ ამ პროცესის დაწყებას. გვჯერა, რომ ამ მიზნამდე ნაბიჯ-ნაბიჯ, მაგრამ მაინც მივალთ ჩვენს პარტნიორებთან ერთად", - განაცხადა ეკა ტყეშელაშვილმა ნატოს საპარლამენტო ასამბლეის როუზ-როსის 76-ე სემინარზე სიტყვით გამოსვლისას.
მისივე განმარტებით, კონფლიქტის საბოლოოდ მოგვარებამდე საქართველოს მთავრობა კონკრეტულ ნაბიჯებს დგამს იმისთვის, რომ "ხალხი, რომელიც ოკუპაციის ხაზმა გახლიჩა, ერთმანეთს თავიდან დააკავშიროს".
"გვესმის, რომ რაც უფრო დრო გადის, ხალხებს შორის უნდობლობა უფრო იზრდება და ეს დაყოფა ღრმავდება. ჩვენ აქტიურად უნდა ჩავერთოთ პროცესში, ვეძებოთ გზები, როგორ მოხდეს გახლეჩილი ადგილების ამოვსება და რა პოლიტიკური გადაწყვეტილება მივიღოთ", - აღნიშნა ტყეშელაშვილმა.
ამასთან, სახელმწიფო მინისტრის აზრით, საქართველოს მთავრობას არც იმის ილუზია აქვს, რომ კონფლიქტების გადაწყვეტა მხოლოდ ქართველ და ოს, ქართველ და აფხაზ ხალხს შორის ურთიერთობის მოგვარებით იქნება შესაძლებელი.
"ჩვენ არ გვაქვს ილუზია, რომ კონფლიქტი მხოლოდ ხალხებს შორის ურთიერთობის მოწესრიგების საფუძველზე გადაწყდება, თუმცა ამ ურთიერთობასაც ყურადღება უნდა მივაქციოთ. კონფლიქტის დარეგულირება არ იქნება ადვილი და ყველა მიზნის შესრულება უცებ არ მოხდება. ჩვენ უნდა გვახსოვდეს, რომ ოკუპაციის განმახორციელებელ ძალაზე ვართ დამოკიდებულნი", - დასძინა სახელმწიფო მინისტრმა.
