ქუთაისში გამართულ საღამოზე ზაზა ბურჭულაძის გამოსვლას საქართველოს პრეზიდენტი გამოეხმაურა. ბრიუსელში სახალხო პარტიის ყრილობაზე გაემგზავრებისას პრეზიდენტმა კომენტარი თვითმფრინავში გააკეთა.
სააკაშვილის თქმით, იგი შეურაცხყოფილია იმ გამონათქვამის გამო, რაც ქუთაისში გასტროლებზე ჩასულმა ლიტერატურული წრის წარმომადგებლებმა დაუშვეს.
"ეტყობა, ზოგიერთი ისე არის დაკავებული მთელი დრო საკუთარი თავის კულტით, რომ ვერ შეამჩნია ის ცვლილებები, რომლებიც მოხდა ჩვენს ქვეყანაში. პრაქტიკულად, ჩარჩა ძველ დროში. ვერ შეამჩნია, რომ შეიცვალა ქუთაისიც, საქართველოც და არავინ არ მისცემს მათ საშუალებას, ზემოდან ქვემოთ უყუროს, დასცინოს, აბუჩად აიგდოს, ღირსება შეულახოს და რომელიღაც ძველი ეპოქის წარმოდგენებით და სტერეოტიპით ელაპარაკოს",_ განაცხადა მიხეილ სააკაშვილმა.
მისი თქმით, ეს ადამიანები უნდა ქალაქში გასულიყვნენ და განახლებული ქუთაისის ცენტრისთვის შეეხედათ. რაც მთავარია, ქუთაისელებისთვის თვალებში უნდა ჩაეხედათ და მაშინ მიხვდებოდნენ, რომ ასეთი ტონით მათთან ლაპარაკი არ შეიძლება.
"საერთოდ, არავისთან არ შეიძლება ასეთი ტონით ლაპარაკი. დროა, ეს ხალხი გამოფხიზლდეს და მიხვდეს, რომ ის დრო დამთავრდა, ის მენტალიტეტი მომთავრდა, შეწყვიტონ ეს ჩარჩენილობა და გაიხედონ ცოტა წინ",_აღნიშნა პრეზიდენტმა.
შეგახსენებთ, გუშინ ქუთაისელი მსმენელის უკმაყოფილება მწერალმა ზაზა ბურჭულაძემ ქართულ-გერმანული ანთოლოგიის პრეზენტაციაზე დაიმსახურა. ქუთაისის ინტელიგენციასთან შეხვედრისას ბურჭულაძემ სკაბრეზული გამონათქვამით მიმართა დარბაზში შეკრებილ საზოგადოებას, რის გამოც დამსწრეთა ნაწილმა დარბაზი დატოვა.
