პრემიერ-მინისტრის პრესსამსახურის ნიკო მჭედლიშვილის განცხადებით, პრემიერმა ნიკა გილაურმა უკვე მოაწერა წერილს ხელი, რომელიც უახლოეს საათებში გადაიგზავნება მალაიზიის პრემიერ-მინისტრთან, სადაც ის თავის კოლეგას ნარკოტიკების უკანონო გადატანის ბრალდებით დაკავებული საქართველოს ორი მოქალაქის, ბაბუცა გორდაძისა და დარეჯან კოხტაშვილის გათავისუფლებას სთხოვს.
"საქართველოს მთავრობა არ იშურებს ძალისხმევას, რომ ამ ქალბატონებს ააცილოს მძიმე სასჯელი, რომელიც მათ ელით მალაიზიაში და ამასთან დაკავშირებით პრემიერ მინისტრმა ნიკა გილაურმა უკვე მოაწერა წერილს ხელი, რომელიც უახლოეს საათებში გაიგზავნება მალაიზიის პრემიერ-მინისტრთან, სადაც ის თავის კოლეგას სთხოვს ამ ქალბატონების გათავისუფლებას", - განაცხადა მჭედლიშვილმა დღეს გამართულ ბრიფინგზე.
მჭედლიშვილის თქმით, საქართველოს მთავარმა პროკურატურამ ამ საქმესთან დაკავშირებით ჩაატარა გამოძიება და დადგინდა, რომ ამ ქალბატონებმა არ იცოდნენ, რომ გადაჰქონდათ ნარკოტიკები და მათ ამ საქმეში კრიმინალური ქსელის წარმომადგენლები იყენებდნენ, ასევე აღმოჩნდა, რომ ბაბუცა გორდაძის მეუღლე ელდარ დავითიანი ორგანიზებას უწევდა ნარკოტიკების არალეგალურ შეტანას მალაიზიაში და მსოფლიოს სხვა ქვეყნებში.
"თქვენო აღმატებულებავ, გთხოვთ მიიღოთ მხედველობაში თბილისის სასამართლოს გადაწყვეტილება და ასევე ამ საქმის ჰუმანიტარული ასპექტი და გაათავისუფლოთ ბაბუცა გორდაძე და დარეჯან კოხტაშვილი პატიმრობიდან. მე მწამს, რომ ეს იქნება კანონისა და მორალის თვალსაზრისით ყველაზე მართებული გადაწყვეტილება" , -წერს ნიკა გილაური წერილში თავის მალაიზიელ კოლეგას.
შეგახსენებთ, რომ საქართველოს მოქალაქეები ბაბუცა გორდაძე და დარეჯან კოხტაშვილი მალაიზიაში გასული წლის შემოდგომაზე, ნარკოტრეფიკის ბრალდებით დააკავეს, რაც ადგილობრივი კანონმდებლობით სიკვდილით ისჯება.
თავად დაკავებულები დანაშაულს არ აღიარებენ და აცხადებენ, რომ ისინი გახდნენ მსხვერპლი ელდარ დავითიანისა, რომელიც გორდაძის მეუღლეა.
აღნიშნულ საქმეში თავად ქართულმა მართლმსაჯულებამ დამნაშავედ სწორედ დავითიანი ცნო და მას თავისუფლების 15 წლით აღკვეთა მიუსაჯა. სასამართლო აქამდე სწორედ ქიმიური ექსპერტიზის დასკვნას ელოდებოდა, რომელმაც დანაშაულში დაკავებულთა ბრაულობა უნდა განსაზღვროს.
