ენერგეტიკის მინისტრის, ალექსანდრე ხეთაგურის განმარტებით, დღეისთვის ქვეყნის ჰიდრორესურსების მხოლოდ 18 % ია ათვისებული.
"ამიტომ, მთავრობამ ფოკუსირება მოახდინა ელექტროენერგიის მაღალი ძაბვის გადამცემ ხაზებზე. თუ არ იარსებებს გადამცემი ხაზები, არავინ დაინტერესდება ჰიდროელეტქროსადგურების მშენებლობით", - განაცხადა ხეთაგურმა სამთავრობო დებატების ფარგლებში, პარლამენტში გამოსვლისას.
ამასთან, მინისტრის განმარტებით, ძალიან მნიშვნელოვანია გამომუშავებული ენერგიის გასაყიდად შესაბამისი ინფრასტრუქტურის შექმნაც.
"ჩვენ დავიწყეთ თურქეთის მიმართულებით ახალი გადამცემი ხაზის მშენებლობა და მისი მშენებლობა 2012 წლის მაისში დასრულდება. მხოლოდ ამ ხაზით ჩვენ შესაძლებლობა გვექნება 700 მგვტ-ის გატარება ვუზრუნველყოთ. მნიშვნელოვანია რომ თურქეთი უკვე შეუერთდა ევროკავშირის ერთიან ქსელს, რაც ჩვენს კომპანიებს საშუალებას მისცემს ევროპაში ელექტროენერგიის ექსპორტი განახორციელონ და სირიაზე და იორდანიაზე გავიდნენ", - აღნიშნა ხეთაგურმა.
