თბილისის ინდივიდუალური გამრიცხველიანება დასრულებულია, რეგიონებში კი ეს პროცესი 2013 წლისთვის დასრულდება.ამის შესახებ ენერგეტიკის მინისტრმა ალეკო ხეთაგურმა დღეს, სამთავრობო დებატების ფარგლებში, პარლამენტში გამოსვლისას განაცხადა.
მისივე განმარტებით, რეგიონების ინდივიდუალური გამრიცხველიანების დასრულება 2018 წლისთვის იყო ნავარაუდევი, თუმცა რამდენიმე კომპანიასთან მიღწეული შეთანხმების საფუძველზე, სამინისტრომ ამ პროცესის დაჩქარება შესძლო.
"კომუნალური მრიცხველების შემოღება იყო ის აუცილებელი ნაბიჯი, რომელიც მომხმარებლების უწყვეტი მომარაგებისთვის უნდა გაკეთებულიყო, თუმც ეს იყო პირველი ეტაპის ამოცანა. მეორე ეტაპი არის ინდივიდუალური გამრიცხველიანება. კომუნალურმა მრიცხველებმა თავისი მოვალეობა უკვე შეასრულეს. ახლა ქვეყანაში დაწყებულია ფართომაშტაბიანი ინდივიდუალური გამრიცხველიანების პროგრამა. თბილისში ეს პროცესი უკვე დასრულებულია, რეგიონებში კი 2013 წლისთვის დასრულდება", - განაცხადა ხეთაგურმა.
ამასთან, მინისტრიეს განმარტებით, არსებობს კონკრეგული გეგმა, რომელშიც დეტალურადაა გაწერული გამრიცხველიანების პროცესის თითოეულ სოფელში დასრულების განრიგი.
"ინდივიდუალური გამრიცხველიანება არ გულისხმობს მხოლოდ მრიცხველების შეცვლას. ამაში მოიაზრება ასევე სადენებისა და ბოძების გამოცვლა, მთელი გამანაწილებელი ქსელის რეაბილიტაცია. თავის მხრივ, ქსელის რეაბილიტაცია კი ნიშნავს მისი სიცოცხლისუნარიანობის 50-60 წლით გაზრდას", - განმარტა მინისტრმა.
