ცნობილი ფინანსისტისა და ბიზნესმენის ჯორჯ სოროსის აზრით, მიმდინარე პერიოდში ევროზონა ერთდროულად სამმხრივ კრიზისს განიცდის. კერძოდ, საბანკო, სავალუტო და სუვერენული ობლიგაციების საბაზრო კრიზისს.
"სიტუაცია უაღრესად რთულია",- მიიჩნევს სოროსი.
"სწორედ რთული ეკონომიკური სიტუაცია წარმოშობს იმ დაპირისპირებას, რომლის შედეგიცაა პოლიტიკური მოვლენები. ევროკავშირის გარკვეულმა ქვეყნებმა სხვადასხვა პოზიცია დაიკავეს, ხოლო მათი პოლიტიკა ამ ქვეყნების აზრს გამოხატავს და არა ნაციის ინტერესებს. აქედან გამომდინარეობს პოლიტიკური კონფლიქტები", _ განმარტავს ჯორჯ სოროსი "ფაინენშელ თაიმსში" გამოქვეყნებულ სტატიაში.
"ევროზონის შექმნა გულისხმობდა, რომ ამიერიდან ყველა მისი წევრი ქვეყანა საკუთარ ეკონომიკურ მაჩვენებელს გაათანაბრებდა", _ აღნიშნავს სოროსი.
ფინანსისტის აზრით, ევროკავშირში ორიარუსიანი სისტემა ჩამოყალიბდა. პირველ იარუსში შედიან ქვეყნები, რომელთაც სტაბილურად პოზიტიური სავაჭრო ბალანსი აქვთ, ხოლო მეორე იარუსში _ მუდმივად უარყოფითი სავაჭრო ბალანსის მქონე ქვეყნები.
"ევროკავშირის თითოეული კრიზისი გადალახვადია", _ მიიჩნევს სოროსი. მათ გადასაჭრელად ორი საკვანძო რეფორმა უნდა გატარდეს: ერთია, სუვერენული ობლიგაციების ბაზრის სტაბილიზირება და, მეორე, _ ევროკავშირის ქვეყნების მიერ ევროობლიგაციის გამოსაშვებად პირობების მომზადება.
