დევნილთა მდგომარეობა გარკვეულ ნაწილში ძალიან მძიმეა და ვერანაირ კრიტიკას ვერ უძლებს. ამის შესახებ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა დღეს, სამთავრობო დებატების დაწყების წინ ჟურნალისტებთან საუბრისას განაცხადა.
"მემკვიდრეობა ძალიან მძიმე დაგვხვდა და ვეთანხმები ზოგადად, რომ დევნილთა მდგომარეობა გარკვეულ ნაწილში ძალიან მძიმეა და ვერანაირ კრიტიკას ვერ უძლებს, მაგრამ სწორედ მისი მოგვარებაა ჩვენი საქმე", - აღნიშნა სუბელიანმა და აქვე დასძინა, რომ ეს ადვილად გასაკეთებელი საქმე არ არის.
მინისტრის თქმით, პარლამენტში თავის გამოსვლაში ყურადღებას გაამახვილებს სამინისტრომ ამ დრომდე დევნილებისთვის რა პრობლემების მოგვრება შესაძლოა და რა დარჩა ჯერ კიდევ მოუგვარებელი.
"ჩვენ სამომავლო გეგმებს მომავალში დევნილებისთვის შემოსავლის წყაროს მოძიებაში დახმარება და მათი საქართველოს სხვადასხვა რაიონებში საცხოვრებლით უზრუნველყოფაა", - აღნიშნავს სუბელიანი.
პარლამენტში ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრს, შრომის, ჯანმრთელობისა და სოციალური დაცვის და რეგიონალური განვითარებისა და ინფრასტრუქტურის მინისტრებთან ერთად 24 მარტს მოუსმენენ.
