საქართველოს საგარეო საქმეთა სამინისტრო კოალიციური ძალების მიერ ლიბიაში სამხედრო ოპერაციის წარმოებას მიესალმება.
"ჩვენ კოალიციის წევრები არ ვართ და შესაბამისად, მას მხარდაჭერას ოფიციალურად ვერ გამოვუცხადებთ, მაგრამ საქართველო მიესალმება გაეროს უშიშროების საბჭოს მიერ მიღებულ რეზოლუციას, რომელიც ლიბიაში სამხედრო ოპერაციის დაწყებას დაედო საფუძვლად", - განაცხადა დღეს გამართულ ტრადიციულ პრესკონფერენციაზე საქართველოს საგარეო საქმეთა მინისტრის მოადგილე ნინო კალანდაძემ.
ამასთან, მან "სამწუხარო" უწოდა ლიბიაში მიმდინარე მოვლენებს და საომარი მოქმედებების შედეგად დაღუპული მოქალაქეების გამო მწუხარება გამოთქვა.
"იმედს ვიტოვებთ, რომ მშვიდობისმყოფელები ლიბიაში დაწყებულ მისიას სწრაფად დაასრულებენ", - აღნიშნა კალანდაძემ.
