ბრწყინვალე შვიდეულის შემდეგ "სახალხო კრება" ბრძოლის გადამწყვეტ ეტაპს დაიწყებს. ამის შესახებ ვერის პარკში მდებარე საკალათბურთო დარბაზში "სახალხო კრების" წარმომადგენელთა შეკრებაზე კრების თავმჯდომარემ, ნონა გაფრინდაშვილმა განაცხადა.
"დღეს კარგად გამოჩნდა თბილისის კომიტეტების მზადყოფნა, ასევე სრულად მობილიზებულია და მზად არის საქართველოს მთელი მასშტაბით შექმნილი სამოქალაქო წინააღმდეგობის 52 (70%) კომიტეტი, 22 კომიტეტი მუშაობის პროცესშია და მათი მზადყოფნის შესახებ განაცხადს უმოკლეს ვადაში ველით. ბრწყინვალე შვიდეულის დასრულებისთანავე სახალხო კრება იწყებს ბრძოლის გადამწყვეტ, საბოლოო ეტაპს, გამოვაცხადებთ მოქმედების კონკრეტულ გეგმას. ამ დღისთვის მთელი საქართველო მზად უნდა იყოს", - აღნიშნა გაფრინდაშვილმა.
შეკრებაში "სახალხო კრების" აღმასრულებელი საბჭოს წევრები, ახალგაზრდული მოძრაობისა და სამოქალაქო წინააღმდეგობის თბილისის კომიტეტების წარმომადგენლები, დედაქალაქის მასშტაბით მოქმედი შეფიცულთა ჯგუფები მონაწილეობდნენ.
