საქართველოს მთავრობა ადასტურებს, რომ ქვეყანამ ცნობილი მილიარდელის დონალდ ტრამპის ბრენდი შეიძინა. საგარეო საქმეთა მინისტრის მოადგილე ნინო კალანდაძე ხელშეკრულების დეტალიზაციას არ ახდენს და "სოლქ როუდ ჯგუფსა" და ცნობილ მილიარდელს შორის გაფორმებული ხელშეკრულების დეტალების გამხელას ვერა ქობალიას უწყებას ანდობს.
"ბრენდი, რომ შევიძინეთ ეს ცალახაა, რადგან დონალდ ტრამპი ინვესტიციით არსად არ შედის ისე, სადაც თავის ბრენდს არ შეიტანს. ეს უკვე ჩვენთვის წარმატებაა. თვითონ ხელშეკრულება, რა ფორმით განისაზღვრა, ამის შესახებ ინფორმაციას ჩვენ არ ვფლობთ. ეს არის ეკონომიკური სახის გარიგება და მის თაობაზეც ეკონომიკის სამინისტროს, სავარაუდოდ, უფრო მეტი ინფორმაცია ექნება"- განაცხადა საგარეო საქმეთა მინისტრის მოადგილემ ორშაბათის ტრადიციულ პრესკონფერენციაზე.
საგარეო საქმეთა მინისტრის მოადგილე აცხადებს, რომ საგარეო უწყებისთვის დანამდვილებით ცნობილია, მხოლოდ ის რომ კონკრეტული შეთანხმება ხელმოწერილია.
"შემდგარია შეთანხმება იმის თაობაზე, რომ ტრამპი საქართველოში შემოვიდეს. თუ რა პირობები ჩაიდო ამ ხელშეკრულებაში ეს მას შემდეგ გახდება ცნობილი, რაც ჩვენთვისაც ეს ხელშეკრულება გახება ხელმისაწვდომი"- აცხადებს ნინო კალანდაძე.
ნინო კალანდაძე აცხადებს, რომ ქვეყნისთვის დიდი მნიშვნელობა ენიჭება იმას, რომ დონალდ ტრამპის სახელი საქართველოს დაუკავშირდება.
"მთავარია, რომ საქართველოში ისეთი დიდი კომპანია და მეწარმე როგორიცაა დონალდ ტრამპი დაინტერესებულია საქართველოში განახორციელოს ინვესტიცია და აქვს სურვილი, რომ საქართველოსთან ბიზნესი აწარმოოს. ისეთი პატარა ქვეყნისთვის, როგორიც საქართველოა და რომელიც საგარეო ინვესტიციებზეა დამოკიდებული და განსაკუთრებით იმ ვითარებაში, რომელშიც ვიმყოფებით, ყველაზე მნიშვნელოვანია, რომ ასეთი ტიპის შეთანხმებები დგება. ტექნიკურად, რა სახით გაფორმდება ეს ხელშეკრულება, მეორე ხარისხოვანია. მთავარია, რომ ეს ხელშეკრულება იდება. ჩვენ ამ ეტაპზე გვიჭირს დავეყრდნოთ იმ ინფორმაციებს, რაც ამერიკული მედიის საშუალებით ვრცელდება_ აღნიშნავს ნინო კალანდაძე
ბათუმში ტრამპ-ტაუერის მშენებლობის დაწყების შეთანხმება ტრამპის ორგანიზაციასა და "სილქ როუდ ჯგუფს" შორის ნიუ-იორკში, ცნობილი მილიარდერის სათავო ოფისში გაფორმდა.
დონალდ ტრამპის კერძო ინვესტიცია პირველ ეტაპზე 250 მილიონი დოლარით განისაზღვრა და ის ბათუმსა და თბილისში საცხოვრებელი კომპლექსის და სასტუმროს მშენებლობას ითვალისწინებს. მშენებლობა თავდაპირველად ბათუმში დაიწყება, შემდეგ კი თბილისში. კომლექსებში, სასტუმრო და საცხოვრებელი ბინების გარდა, იქნება სამორინეები და საოფისე ფართობი.
აღსანიშნავია, რომ New York Times-ის ინფორმაციით, ტრამპი საქართველოში თავისი სახელის ლიცენზირებას განახორციელებს და მისი კომპანია საქართველოში "ტრამპ თაუერების" მენეჯმენტს მოახდენს. გამოცემის ინფორმაციით, ამ ეტაპზე თავად ტრამპი პროექტებში საკუთარი თანხის ჩადებას არ აპირებს,
დაგეგმილი პროექტი ითვალისწინებს Trump Tower Tbilisi-ის მშენებლობას ვარდების რევოლუციის მოედანზე; და ასევე Trump Riviera-ს მშენებლობას ბათუმში. მშენებლობის დაწყება, რომელიც Silk Road Group-ის ზედამხედველობით განხორციელდება, 2013 წლიდან იგეგმება, იტყობინება New York Times-ი.
