ლიბიის მეთაურმა მუამარ კადაფმა რუსეთს, ჩინეთსა და ინდოეთს მოუწოდა ფულის ინვესტირება ლიბიის ნავთობის სექტორში განახორციელონ. ეს განცხადება კადაფმა ამ ქვეყნების ელჩებთან გამართული მოლაპარაკებების დროს გააკეთა.
"ელჩებთან საუბრის დროს გაკეთდა მოწოდება ამ ქვეყნების ნავთობის კომპანიებისადმი - განახორციელონ თანხების ინვესტირება ლიბიის ნავთობის ინდუსტრიაში", - იუწყება ლიბიის სახელმწიფო ტელევიზია.
აღსანიშნავია, რომ ლიბიის ნავთობის მრეწველობა ქვეყანაში მიმდინარე სამოქალაქო ომის გამო სერიოზულად დაზარალდა. იგრძნობა კადრების დეფიციტი, რომლებიც ნავთობის სადგურების მომსახურებისათვის არიან საჭირო. თავის ნეგატიურ გავლენას ახდენს ასევე საერთაშორისო სანქციები და რიგი ბანკების უარი განახორციელონ ოპერაციები, რომლებიც ლიბიურ კომპანიებთანაა დაკავშირებული.
ლიბია მოუწოდებს კომპანიებს განაახლონ ნავთობის მოპოვება და გადაზიდვა. ქვეყნის ხელისუფლებამ უკვე გააკეთა განცხადება იმის შესახებ, რომ ნავთობის პორტების უსაფრთხოება უზრუნველყოფილია. ნავთობის კომპანიების თანამშრომლებს სთხოვენ სამუშაოს დაუბრუნდნენ, უცხოურ კომპანიებს კი მოუწოდებენ გამოაგზავნონ ტანკერები ნავთობის ტერმინალებზე დასატვირთად.
საბრძოლო მოქმედებების დაწყებამდე შავი ოქროს მოპოვების მოცულობა ლიბიაში დღეში 1, 6 ბარელს უდრიდა. სახელმწიფოში მუშაობდნენ ცნობილი კორპორაციები, ისეთები როგორებიცაა ამერიკული "ConocoPhillips" და "ExxonMobi", ბრიტანულ-ნიდერლანდური "Royal Dutch Shell", იტალიური "Eni" და ესპანური "Repsol"-ი.
ამჟამად, რუსეთი და ჩინეთი ლიბიის არასაფრენ ზოლად გამოცხადების წინააღმდეგ გამოდიან. ამასთან ერთად ლიბიის ტერიტორიაზე საბრძოლო მოქმედებები არ წყდება.