საქართველოს საგარეო საქმეთა მინისტრის მოადგილის ნინო კალანდაძის განცხადებით, ვაჭრობის მსოფლიო ორგანიზაციაში რუსეთის საქართველოს თანხმობის გარეშე გაწევრიანების თეორიული შანსი არსებობს.
"რასაკვირველია, ვმო-ში რომელიმე ქვეყნის გაწევრიანების საკითხი კონსესუსის საფუძველზე ხდება, თუმცა როგორც ჩემთვისაა ცნობილი, ორგანიზაციის წესდება ითვალისწინებს, რომ მსგავსი რამ რომელიმე ერთი ქვეყნის გერდით ავლითაც მოხდეს", - განუცხადა ნინო კალანდაძემ ჟურნალისტებს, თუმცა აქვე განმარტა, რომ ასეთ პრეცენდენტს ჯერჯერობით ადგილი არ ჰქონია.
ამასთან, კალანდაძის თქმით, კონსესუსის პრინციპის დარღვევა და აღნიშნული გამონაკლისის დაშვება მხოლოდ იმ შემთხვევაში ხდება, თუკი შესაბამის გადაწყვეტილებას ორგანიზაციის წევრი სახელმწიფოები ერთხმად მიიღებენ.
"ძალიან გამიკვირდება, თუკი ასეთი პრეცენდენტის დაშვებას მოინდომებს სავაჭრო ორგანიზაცია. ეს იქნება ძალიან იშვიათი და უცნაური გამონაკლისი", - აღნიშნა კალანდაძემ.
გარდა ამისა, მინისტრის მოადგილის მტკიცებით, ვაჭრობის მსოფლიო ორგანიზაციაში რუსეთის გაწევრიანების საკითხი საქართველოსთვისაც არანაკლებ მნიშვნელოვანია და სწორედ ამიტომ მოლაპარაკებების პროცესს ოფიციალური თბილისი მაქსიმალურად კონსტრუქციულად უდგება.
"ეს საკითხი ყველასთვის არის მნიშვნელოვანი, მათ შორის ჩვენთვის. შესაბამისად, დიალოგში ჩვენ ვართ მაქსიმალურად კონსტრუქციულები. ვცდილობთ, რომ ხელშემწყობი პოზიცია გაგვაჩნდეს, თუმცა ამავდროულად ჩვენი პრინციპული პოზიციაა, საქართველოს ინტერესები სრულად იყოს დაცული. ჩვენ არაფერ განსაკუთრებულს არ ვითხოვთ და არავითარ შემთხვევაში რუსეთის გაწევრიანების საკითხის განხილვის წინაპირობად პოლიტიკურ საკითხებს არ ვაყენებთ", - აღნიშნა კალანდაძემ.
მინისტრის მოადგილის თქმით, მოლაპარაკებების პირველი რაუნდის ფარგლებში, ორივე მხარემ გამოთქვა სურვილი, რომ აღნიშნულ საკითხზე პოზიციები დაახლოოს.
შეგახსენებთ, რომ თბილისსა და მოსკოვს შორის ვაჭრობის მსოფლიო ორგანიზაციაში რუსეთის გაწევრიანების საკითხზე მოლაპარაკებები დაიწყო. მოლაპარაკებათა პირველი რაუნდი 10 მარტს, შვეიცარიის დედაქალაქ ბერნში გაიმართა.
