ბათუმის ტერიტორიაზე პარკირების ორგანიზების თვითმმართველი ერთეულის მიერ დადგენილი წესის დარღვევით განხორციელება ფიზიკური პირის 100 ლარის, ხოლო იურიდიული პირის 200 ლარით დაჯარიმებას გამოიწვევს.
აღნიშნულთან დაკავშირებით ცვლილება "ადმინისტრაციულ სამართალდაღვევათა კოდექსში" შედის, რომლის ინიციატორი აჭარის ავტონომიური რესპუბლიკის მთავრობაა.
კანონპროექტის თანახმად, ჯარიმის დაკისრების შემდეგ, ორი დღის განმავლობაში დარღვევის გამოუსწორებლობა გამოიწვევს ფიზიკური პირის 200 ლარით, ხოლო იურიდიული პირის 400 ლარით დაჯარიმებას.
დაკისრებული ჯარიმის დადგენილ ვადებში ნებაყოფლობით გადაუხდელობის შემთხვევაში კი პირს საურავი დაკისრებული ჯარიმის სრული ოდენობით დაერიცხება.
ამასთან, ბათუმის ტერიტორიაზე პარკირების ადგილას ავტოსატრანსპორტო საშუალების პარკირებისთვის თვითმმართველი ერთეულის მიერ დადგენილი საფასურის გადახდის გარეშე ავტოსატრანსპორტო საშუალების დგომა ან/და პარკირების სხვა წესების დარღვევა გამოიწვევს დაჯარიმებას 10 ლარის ოდენობით.
ჯარიმის ნებაყოფლობით გადაუხდელობის შემთხვევაში, ვადის გასვლის შემდეგ პირს საურავის სახით 150 ლარის დაეკისრება, ხოლო საურავის დარიცხვიდან 30 დღის ვადაში ჯარიმის და საურავის გადაუხდელობის შემთხვევაში ავტომანქანის რეალიზება განხორცილდება საქართველოს კანონმდებლობით დადგენილი წესით, ჯარიმისა და საურავის გადახდის უზრუნველყოფის მიზნით.
ავტომანქანის სპეციალურ სადგომზე გადაყვანისას, ავტომაქანის ტრანსპორტირების და სადგომზე შენახვის ხარჯები ჯარიმასთან ერთად დაეკისრება მძღოლს ან ავტომანქანის მესაკუთრეს.
იმ შემთხვევაში თუ ავტომანქანა გადაყვანილი იქნება სპეციალურ დაცულ სადგომზე ავტომანქანა მის მფლობელს ან/და მესაკუთრეს დაუბრუნდება ტრანსპორტირებისა და სადგომზე შენახვის ხარჯებისა გადახდის დამადასტურებელი დოკუმენტის, ავტომანქანის სარეგისტრაციო მოწმობისა და პირადობის დამადასტურებელი მოწმობის საფუძველზე.
