დღეს დილით იაპონიაში მყოფი ქართველი ძიუდოისტები საქართველოში ჩამოფრინდნენ. მათ ქვეყნის დატოვება საჰაერო სივრცის გახსნისთანავე შეძლეს. სპორტსმენები თურქეთის ავიახაზებით დაბრუნდნენ სამშობლოში.
საქართველოს ძიუდოისტთა ნაკრების წევრ ირაკლი ცირეკიძის თქმით, სპორტსმენები მოსასვენებელ ოთახში იყვნენ, როცა ძლიერი ბიძგები დაიწყო. თუმცა მათ შორის არავინ დაშავებულა და პანიკაც ნაკლები იყო, რადგან ცუნამი სხვა მიმართულებით მოძრაობდა.
ქართველ ძიუდოისტთა ინფორმაციით, ტოკიოში იმყოფებიან სუმოისტებიც, თუმცა მათთან დაკავშირება მოხერხდა და ისინიც საფრთხეში არ არიან.
შეგახსენებთ, ქართველი ძიუდოისტები იაპონიაში წვრთვნებზე იმყოფებოდნენ. იაპონიაში მომხდარი მიწისძვრისა და ცუნამის გამო მათ ერთი დღით შეუფერხდათ სამშობლოში დაბრუნება.
