ამერიკის შეერთებული შტატების ვიცე-პრეზიდენტი ჯოზეფ ბაიდენი რუსეთის სასამართლო და პოლიტიკურ სისტემას აკრიტიკებს.
"რუს ხალხს სურს, ჰქონდეს შესაძლებლობა აირჩონ ნაციონალური და ადგილობრივი ლიდერები კონკურენტულ არჩევნებში, მას უნდა გააჩნდეს შეკრების თავისუფლება და სახელმწიფოსგან დამოუკიდებელი მედია. მას სურს იცხოვროს ქვეყანაში, რომელიც კორუფციას ებრძვის. ეს არის დემოკრატია და მე მოვუწოდებ ყველას: ნუ წახვალთ კომპრომისზე, როდესაც საუბარია დემოკრატიის საბაზისო ელემენტებზე. თქვენ არ გჭირდებათ ფაუსტის ტიპის გარიგება", - წერს "The New York Times", რომელიც ბაიდენის მოსკოვში ვიზიტს ვრცელ სტატიას უძღვნის.
ამასთან, სტატიის ავტორის განმარტებით, აშშ-ს ვიცე პრეზიდენტმა რუსეთში ადამიანის უფლებების დარღვევის პრობლემაზეც გაამახვილა ყურადღება და ჩამოთვალა მთელი რიგი ხმაურიანი საქმეები, მათ შორის ნავთობმაგნატის მიხეილ ხადარკოვსკის დაკავება და სერგეი მაგნიტსკის მკვლელობა, რომლებიც ადამიანის უფლებების დარღვევის მაგალითებად დაასახელა.
"ზოგიერთებმა შეიძლება მკითხოს, ასეთ განცხადებას ხმამაღლა როგორ ვაკეთებ, თუკი რუსეთთან უკეთეს ურთიერთობებს ველით, მაგრამ ასეთი განცხადებები აუცილებელია სწორედ უკეთესი ურთიერთობებისთვის. ჩვენ არჩევანის გაკეთება არ უნდა გვჭირდებოდეს. ჩვენ ძველებურად გავაპროტესტებთ ადამიანის უფლებების დარღვევის ფაქტებს და ყოველთვის ღიად ვისაუბრებთ საფრთხებზე, რომელიც დემოკრატიას და კანონის უზენაესობას დაემუქრება", - აღნიშნა ბაიდენმა.
