იაპონიის "ფუკუსიმა -I" ატომურ ელექტროსადგურზე რადიაციის გაჟოვნვა მოხდა. აღნიშნული ინფორმაცია იაპონიის მინისტრთა კაბინეტის გენერალურმა მდივანმა იუკაიო ედანომ დაადასტურა.
"ჩვენ ვსწავლობთ მიზეზებსა და არსებულ ვითარებას, როგორც კი გვექნება სათანადო ინფორმაცია მას საზოგადოებას მივაწვდით"- განაცხადა ედანომ.
შეგახსენებთ, რომ "ფუკუსიმა I"-ის ატომურ ელექტროსადგურზე მომხდარი აფეთქების შედეგად ერთ-ერთი ბლოკის შიდა კედელი დანგრეულია. აფეთქების რაიონში მეხანძრეთა და მედიკოსთა ბრიგადებია გაგზავნილი.
ამასთან ერთად, იაპონური ტელეკომპანია "NHK" პრეფექტურის ადმინისტრაციაზე დაყრდნობით ავრცელებს ინფორმაციას, რომ ელექტროსადგურის ტერიტორიაზე რადიაციული ფონი იზრდება.
პარალელურად, იაპონიის ხელისუფლებამ ატომური სადგურის "ფუკუსიმა II" -ის ირგვლივ მდებარე ათკილომეტრიანი ზონიდან მოსახლეობის ევაკუაცია დაიწყო.
"ფუკუსიმა II" -ის ატომური ელექტროსადგური "ფუკუსიმა I" ატომური ელექტროსადგურიდან 12 კილომეტრის დაშორებით მდებარეობს.
