ევროსასამართლოს ყოფილი მოსამართლე მინდია უგრეხელიძე შეფიცულთა რაზმების შექმნას დადებითად აფასებს.
"ადამიანის უფლებათა დაცვა საქართველოს თითოეული მოქალაქის წმიდათაწმიდა ვალია. შეფიცულთა რაზმის შექმნის იდეა იმის გამო გაჩნდა, რომ ჩვენი მოქალაქეები ხელისუფლების უკანონო ქმედებისაგან დავიცვათ", _ აღნიშნა უგრეხელიძემ "ჯი-ეიჩ-ენთან" საუბრისას.
მისი თქმით, თუკი ეს იდეა კვალიფიციურად განხორციელდება, ეს მხოლოდ მისასალმებელი იქნება.
"რა თქმა უნდა, უმჯობესი იქნება, თუ ეს იდეა იმ ადამიანების მიერ განხორციელდება, რომლებიც ამისთვის ფსიქოლოგიურად, ორგანიზაციულად უკეთესად იქნებიან მომზადებულნი. მთავარია, დაცულ იქნას ყველა აუცილებელი პირობა და სწორი მიმართულებით გაკეთდეს საქმე. თუ ასე მოხდება, შეფიცულებს ნამდვილად შესწევთ უნარი, თავისი მაღალი მისია შეასრულონ", _ აღნიშნა უგრეხელიძემ.
შეგახსენებთ, დღეს ჭადრაკის სასახლეში "სახალხო კრების" სპეციალური ორგანოს _ შეფიცულთა რაზმის ფიცის დადების ცერემონია გაიმართა. შეფიცულებთან დაკავშირება და მათგან დახმარების თხოვნა ნებისმიერ მოქალაქეს ცხელი ხაზის მეშვეობით შეეძლება. შეფიცულები მთელი საქართველოს მასშტაბით იმოქმედებენ.
