"მალე გამოცხადდება დაუმორჩილებლობის დღე და ჩვენ ვიქნებით ცარიელი ხელებით,"_აცხადებს "დემოკრატიული მოძრაობის" ლიდერი ნინო ბურჯანაძე.
მისი თქმით, ეს ხელისუფლება არჩევნებამდე წავა. თუმცა ბუჯანაძე "ჯი-ეიჩ-ენთან" საუბრისას ვერ აკონტკრეტებს, თუ როგორ დათმობს ხელისუფლება საკუთარ პოსტს არჩევნებამდე. "ამაზე ვმუშაობთ", _ ასეთია ბურჯანაძის პასუხი.
"მალე მოვა დრო, როცა წავალთ არჩევნებზე. მაგრამ ამ არჩევნებამდე წავა ეს ხელისუფლება, რომელიც არ დაუშვებს, რომ ქვეყანაში ნორმალური არჩევნები ჩატარდეს", _ აცხადებს ბურჯანაძე.
"დემოკრატიული მოძრაობის" ლიდერის თქმით, არ შეიძლება საკუთარი ხალხის მასხარად აგდება და მისთვის უცხო, მიუღებელი ფასეულობების თავს მოხვევა.
"სამართალი მოდის, ამიტომ დავდგეთ ერთმანეთის გვერდით", _ განაცხადა ბურჯანაძემ. მან აღნიშნა, რომ ხალხისთვის 25 ნოემბერს მიცემული პირობა შესრულდა. ამ დაპირების თანახმად, სახალხო დაუმორჩილებლობის კომიტეტებთან ერთად, შეფიცულთა რაზმებიც შეიქმნა.
"ნურავის ექნება ილუზია, რომ ბრძოლას მოუგებს იმ ხალხს, რომელსაც ყველაზე დიდი იარაღი აქვს_ სიმართლე", _ მიიჩნევს ბურჯანაძე.
შეგახსენებთ, დღეს ჭადრაკის სასახლეში "სახალხო კრების" სპეციალური ორგანოს _ შეფიცულთა რაზმის ფიცის დადების ცერემონია გაიმართა. შეფიცულებთან დაკავშირება და მათგან დახმარების თხოვნა ნებისმიერ მოქალაქეს ცხელი ხაზის მეშვეობით შეეძლება. შეფიცულები მთელი საქართველოს მასშტაბით იმოქმედებენ.
