"არ მოჭრილა ისეთი ფული, რომელიც არ გამოილევა. იუდამაც აიღო 30 ვერცხლი, მაგრამ მიუყარა მღვდელმთავრებს. მთავარია, იუდას სახელით არ აიღო ფული", _ აცხადებს წარმომადგენლობითი სახალხო კრების შეფიცულთა რაზმის ხელმძღვანელი, მსახიობი გია ბურჯანაძე.
მისი თქმით, ხელისუფლების მსახურება, როცა მშვიდობიან მოქალაქეებს რეზინის ტყვიას ესვრი და ხელკეტს ურტყამ, ამისთვის კი ფულს იღებ, ადამიანისთვის დამამცირებელია.
"ბრძოლას ყოველთვის აქვს აზრი. შეფიცულთა იარაღი არის სიმართლე და სამშობლოს სიყვარული. ვისაც სიმართლე არ აქვს, ის რეზინის ტყვიითა და ხელკეტით იბრძვის. გვსურს, ჩვენი სიმართლით მათაც ავუხილოთ თვალი", _ აღნიშნა ბურჯანაძემ.
შეგახსენებთ, დღეს ჭადრაკის სასახლეში "სახალხო კრების" სპეციალური ორგანოს _ შეფიცულთა რაზმის ფიცის დადების ცერემონია გაიმართა. შეფიცულებთან დაკავშირება და მათგან დახმარების თხოვნა ნებისმიერ მოქალაქეს ცხელი ხაზის მეშვეობით შეეძლება. შეფიცულები მთელი საქართველოს მასშტაბით იმოქმედებენ.
