საქართველოს პრეზიდენტი რუსეთის ძალოვან უწყებას ურჩევს, წარმატებული რეფორმირებისთვის "არც 10 და არც 100 ათასი დოლარი მოიპაროს".
"ჩვენთვის პოლიციის რეფორმა არ იყო მთავარი. ეს ერთ-ერთი იყო. რეფორმები ჩატარდა ყველა უწყებაში, საბაჟოზე, საგადასახადო სისტემაში, სახელმწიფო აპარატში... როცა სახელმწიფო აპარატის რეფორმირება გინდა, მას სხვა დანარჩენი უნდა მოჰყვეს - უნდა გყავდეს არაკორუმპირებული ელიტა. დაივიწყო პირადი ინტერესები, არ უნდა მოიპარო არც 10 და არც 100 ათასი დოლარი, თუ გინდა, რომ ქვეყანა გქონდეს", - განაცხადა მიხეილ სააკაშვილმა "კომერსანტთან" ინტერვიუში, რომლის კორესპონდენტსაც საქართველოს პრეზიდენტის აზრი რუსეთის სახელშეცვლილ მილიციაზე აინტერესებდა.
ამავე ინტერვიუში ჟურნალისტმა მიხეილ სააკაშვილს დომოდედოვოს აეროპორტში მომხდარ აფეთქებაში საქართველოს კვალის შესაძლო არსებობის შესახებ რუსეთის რიგი მაღალჩინოსნის მიერ გამოთქმული მოსაზრებების კომენტირებაც სთხოვა, რაზეც პრეზიდენტმა აღნიშნა, რომ "ამას სერიოზულად არავინ აღიქვამს".
"საქართველოს მთავრობაში ვერ იპოვით ცეცხლთან თამაშის მსურველს", - აღნიშნა სააკაშვილმა.
