დღეს სახალხო წარმომადგენლობითმა კრებამ ჭადრაკის სასახლეში შეფიცულთა რაზმი დააფუძნა. შეფიცულთა ხელმძღვანელია სახალხო კრების წევრი, მსახიობი გია ბურჯანაძე. შეფიცულებმა ფიციც დადეს, რომ სამშობლოს ეროვნული ინტერესების დაცვით, "მართალი სამართლის" პრინციპით იმოქმედებდნენ. ამასთან, ისინი მზად არიან, გამოექომაგონ ხელისუფლების ძალადობისა და უკანონობის მსხვერპლთ, იბრძოლონ სიტყვისა და გამოხატვის თავისუფლებისთვის.
როგორც "დემოკრატიული მოძრაობის" ლიდერმა ნინო ბურჯანაძემ "ჯი-ეიჩ-ენთან" საუბრისას აღნიშნა, შეფიცულთა რაზმი თბილისის მასშტაბით 1500-მდე კაცს ითვლის. პარალელურად, შეფიცულთა რაზმები მთელ საქართველოსაც მოიცავს.
გია ბურჯანაძის თქმით, დღესდღეობით საქართველოს მოსახლეობა დაუცველია. ამდენად, თუკი მოქალაქის საყოველთაოდ აღიარებული უფლებები დაირღვევა, შეფიცულები მათ დაეხმარებიან.
ორგანიზატორების თქმით, შეფიცულთა რაზმს იარაღი არ ექნება. მათი იარაღი სამართლიანობა და ცარიელი ხელები იქნება.
"ჩვენ ღონიერი, მკლავმაგარი ბიჭები, რომელთა სიმაღლეც მაინცდამაინც ორ მეტრს უნდა აღწევდეს, არ შეგვირჩევია. ასეთი კუნთმაგარი ბიჭები სააკაშვილს მრავლად ჰყავს და მას ემსახურებიან უსამართლობის დასამკვიდრებლად, სცემენ მშვიდობიან მოსახლეობას. ჩემთვის ფიზიკურ ღონეს მნიშვნელობა არ აქვს, ჩვენთან მთავარია სიმართლისთვის გულანთებული ადამიანების ერთად დგომა. ნეტარ არიან მებრძოლნი სიმართლისთვის, რამეთუ მათი არს სასუფებელი ცათა",_განაცხადა გია ბურჯაბაძემ "ჯი-ეიჩ-ენთან" საუბრისას.
ცნობისთვის, შეფიცულთა წესდება იურისტ ზაქარია ქუცნაშვილს ეკუთვნის, ხოლო მათი ემბლემა_ბოლნური ჯვრის გამოსახულებით_ მხატვარ ემირ ბურჯანაძის ნახელავია.
შეფიცულებთან დაკავშირება ცხელი ხაზის მეშვეობით შეიძლება, რომელსაც სავარაუდოდ, ხვალ გამოაცხადებენ.
