დაცული ტერიტორიების სააგენტოს თავმჯდომარე გიორგი შონვაძემ, ევროპის საბჭოს კულტურის, კულტურული და ბუნებრივი მემკვიდრეობის დირექტორმა რობერტ პალმერმა და ბიომრავალფეროვნების კონსერვაციისა და კვლევითი ცენტრის "ნაკრესის" თავმჯდომარე ირაკლი შავგულიძემ ევროკომისიის და ევროსაბჭოს ერთობლივი პროგრამის ფარგლებში შეთანხმებას მოაწერეს ხელი.
შეთანხმების მიხედვით "დაცულ ტერიტორიებზე სამუშაო პროგრამის ხელშეწყობა ბიომრავალფეროვნების კონვენციის განსახორციელებლად" პროგრამის ფარგლებში დაცული ტერიტორიების სააგენტოს 4 000 ევროს დაფინანსება და კვლევით ცენტრ "ნაკრესს" 30 000 ევროს დაფინანსება გამოეყო.
პროექტის ფარგლებში გამოიცემა პუბლიკაციები დაცული ტერიტორიების შესახებ, განხორციელდება დაცულ ტერიტორიებზე შერჩეული სახეობების და ჰაბიტატების გავრცელების რუკების გეოინფორმაციულ სისტემებში მომზადება, ყველა შერჩეული ტერიტორიისთვის ციფრული საზღვრების და საინფორმაციო ბაზების შექმნა და ევროპის საბჭოსთვის საბოლოო ანგარიშის მომზადება.
პროგრამის მიზანია საქართველოში ზურმუხტის ქსელისთვის სპეციალური კონსერვაციული ღირებულების მქონე ტერიტორიების იდენტიფიცირება, დაცულ
ტერიტორიებზე არსებული უნიკალური ჰაბიტატების დაცვის და ევროკავშირის მოთხოვნებთან ჰარმონიზაციის ხელშეწყობა.
"ზურმუხტის ქსელი" არის "ნატურა 2000"-ის ანალოგიური ქსელი ევროკავშირის არაწევრი ქვეყნებისათვის. დღესდღეობით ქსელში გაწევრიანებულია 50-მდე ქვეყანა.