საპარლამენტო ოპოზიციის შეფასებით, ხელისუფლება "მეხანძრის" პრინციპით მოქმედებს. ამის შესახებ დღეს, პარლამენტის პლენარულ სხდომაზე სიტყვით გამოსვლის დროს "ქრისტიან-დემოკრატების" წევრმა, ლევან ვეფხვაძემ განაცხადა.
"მართალია ხელისუფლება პენსიონერებს დაპირდა, რომ 1-ლი სექტემბრიდან პენსიას 100 ლარამდე გაუზრდის, მაგრამ საინტერესოა, რას უპირებს ხელისუფლება მათ 1-ელ სექტემბრამდე", - აღნიშნა ვეფხვაძემ.
დეპუტატი დაინტერესდა, რას აპირებს ხელისუფლება აპრილ-მაისის თვეში, მაშინ, როდესაც ქვეყანაში ფასები კიდევ მოიმატებს.
"თქვენ მოქმედებთ მეხანძრის პრინციპით, ცდილობთ ჩააქროთ ხანძარი, მაგრამ პრობლემა ისაა, რომ ამასაც ვერ ახერხებთ. თქვენ ვერ ახერხებთ პენსიონერებს შეეხიდოთ ყველაზე კრიტიკულ პერიოდში -აპრილ-მაისში, როდესაც ფასები გაიზრდება", - დაძინა ოპოზიციონერმა დეპუტატმა და აქვე აღნიშნა, რომ ხელისუფლება პენსიების ზრდას მოსახლეობას სექტემბრისთვის მხოლოდ იმიტომ პირდება, რომ მანამდე ბიუჯეტში ამის რესურსი არ აქვს.
