ქართული მხარე ჟენევის მოლაპარაკებათა მორიგი რაუნდის უშედეგოდ დასრულებას რუსეთს აბრალებს. "როგორც ყოველთვის მოლაპარაკებათა ამ რაუნდზეც მნიშვნელოვან პროგრესს ადგილი არ ჰქონია... რუსეთის მხარის არაკონსტრუქციულობის გამო არც ერთ საკითხზე შეთანხმება არ იყო მიღწეული", - განაცხადა საქართველოს საგარეო უწყების ხელმძღვანელის პირველმა მოადგილე ნიკოლოზ ვაშაკიძემ დღეს გამართულ ტრადიციულ პრესკონფერენციაზე, რომელზეც ჟენევაში გამართული მოლაპარაკებების მე-15 რაუნდის შედეგები შეაფასა.
ამასთან, მისივე განმარტებით, მოლაპარაკებების ფარგლებში შეერთებული შტატების სახელით აშშ-ს სახელმწიფო მდივნის მოადგილის თანაშემწე ფილიპ გორდონმა "კიდევ ერთხელ დააფიქსირა ურყევი მხარდაჭერა საქართველოს ტერიტორიული მთლიანობისადმი და იმას, რაც აფხაზეთსა და ე.წ. სამრეთ ოსეთში ხდება, "ოკუპაცია" უწოდა".
მოლაპარაკების მე-15 რაუნდი ჟენევაში 4 მარტს გაიმართა. მასში თბილისის, მოსკოვის, სოხუმის, ცხინვალის, ასევე ვაშინგტონის, ევროკავშირის და გაეროს წარმომადგენლები მონაწილეობდნე. შეხვედრაზე მხარეებმა უსაფრთხოების დამატებით მექნიზმებს - თავდაუსხმელობის შესახებ ხელშეკრულების გაფორმების, დევნილების დაბრუნებისა და ოკუპირებულ ტერიტორიაზე საერთაშორისო მეთვაყურეთა დაშვების საკითხები განიხილეს.
