"ეს არის აშშ-ის ჩამოყალიბებული პოზიციის კიდევ ერთხელ გამეორება და მხარდაჭერა საქართველოს სუვერენიტეტისა და ტერიტორიული მთლიანობისადმი", _ ასე აფასებენ თბილისში ჰილარი კლინტონის თანაშემწის ფილიპ გორდონის განცხადებას.
საქართველოს საგარეო უწყებაში ამბობენ, რომ მნიშვნელოვანია, როცა აშშ ხშირად საუბრობს საქართველოს დეოკუპაციაზე.
საქართველოს საგარეო მინისტრის მოადგილე სერგი კაპანაძე აცხადებს, რომ ეს იდეა აშშ-ს უკვე კარგა ხანია ფორმირებული აქვს ყველაზე მაღალ დონეზე _თეთრი სახლის, სახელმწიფო დეპარტამენტის, უშიშროების საბჭოს დონეზე ეს საკითხები ნამდვილად მეორდება.
"მნიშვნელოვანია, რომ ეს პოზიციაც რუსეთის ფედერაციასთან საუბარშიც ფიქსირდება. ამიტომ აშშ-ის მხრიდან ეს განცხადება შეიძლება აღვიქვათ, როგორც აშშ-ის მიერ საქართველოს სუვერენიტეტისადმი მხარდაჭერა და მათი მხარდაჭერა საქართველოს დეოკუპაციისადმი,"_აცხადებს სერგი კაპანაძე.
შეგახსენებთ, ფილიპ გორდონმა აღნიშნა, რომ აშშ პატვს სცემს საქართველოს სუვერენიტეტსა და ტერიტორიულ მთლიანობას. "მივიჩნევთ, რომ რუსეთი ამ ყველაფერს არღვევს. ჩვენ არ გვაკმაყოფილებს არსებული მდგომარეობა და მცდელობას არ ვიშურებთ, რომ ის შეიცვალოს,"_ განაცხადა ფილიპ გორდონმა ბრატისლავაში გლობალური უსაფრთხოების ფორუმზე სიტყვით გამოსვლისას.
მანვე საქართველოსთან მიმართბით ვაშინგტონის სტრატეგიაზეც ისაუბრა და დასძინა, რომ მათი მიზანია საქართველო ე.წ. სამხრეთ ოსეთისა და აფხაზეთის მოსახლებისთვის მიმზიდველ ქვეყნად იქცეს. ამის შემდეგ ისინი თავად მოინდომებენ გაერთიანებული საქართველოს შემადგენელი ნაწილი იყვნენ,"_განაცხადა ფილიპ გორდონმა.
