საჯარო რეესტრის ეროვნულ სააგენტოს შვედი ექსპერტები ეწვევიან. შეხვედრას, საჯარო რეესტრის თავმჯდომარე სოსო წიქარიშვილი, აღსრულების ეროვნული ბიუროს თავმჯდომარე ნიკა მელია და შვედეთის სააღსრულებო სააგენტოს დირექტორი აღსრულების საკითხებში სვენ კილგრენი დაესწრებიან.
შეხვედრაზე საჯარო რეესტრის თავმჯდომარე უწყებაში განხორციელებული რეფორმების შესახებ პრეზენტაციას გამართავს და შვედ კოლეგებს საჯარო რეესტრში არსებულ ვითარებას გააცნობს.
შვედი ექსპერტები აღსრულების ეროვნულ ბიუროში ერთკვირიანი სამუშაო ვიზიტით იმყოფებიან. ვიზიტი შვედეთის საერთაშორისო განვითარების სააგენტოს მიერ დაფინანსებული პარტნიორობის პროექტის ფარგლებში ხორციელდება. პროექტი 2010 წლიდან დაიწყო და 2013 წელს დასრულდება. მისი ბიუჯეტი 5 000 000 დოლარია. პროექტის მიზნებია სააღსრულებო მომსახურების შესახებ, საერთაშორისო პრაქტიკაზე დაყრდნობით პროფესიული ინფორმაციის გაცვლა და აღსრულების ეროვნული ბიუროს მხარდაჭერა სტრატეგიული გეგმის განხორციელებაში.
ვიზიტის ფარგლებში, შვედი ექსპერტები, აღსრულების ეროვნულ ბიუროში მიმდინარე და დაგეგმილი სამუშაოების ანალიზის საფუძველზე, ბიუროს განვითარების მხარდაჭერისა და ხელშეწყობის მიზნით, პროექტის აქტივობების დეტალურად გაწერაზე მუშაობენ. ასევე საკანონმდებლო და სააღსრულებო წარმოების, სტრატეგიული და ადამიანური რესურსების მართვის, ქონების შეფასებისა და სხვა ორგანიზაციული საკითხების შესახებ აღსრულების ეროვნული ბიუროს თანამშრომლებთან სამუშაო შეხვედრებს მართავენ.
სამუშაო შეხვედრები მთელი კვირის განმავლობაში გაგრძელდება.
