უახლოეს ხანებში ფინანსთა მინისტრი კახა ბაინდურაშვილი საზოგადოებას დონორთა მხარდაჭერის და სახელმწიფო ვალის შესახებ დეტალურ ინფორმაციას მიაწოდებს.
ასეთი დავალება კახა ბაინდურაშვილმა პირადად პრემიერ-მინისტრისგან მიიღო.
როგორც გილაური აცხადებს, 2008 წლის დონორთა კონფერენციის შემდეგ გამოყოფილი თანხების შესახებ საზოგადოებას დეტალური ინფორმაცია უნდა მიეწოდოს.
დონორთა მხარდაჭერისა და სახელმწიფო ვალის შესახებ ინფორმაცია ფინანსთა მინისტრმა დღეს მთავრობის წევრებს გააცნო.
პრემიერ-მინისტრის განმარტებით, აღნიშნული თანხის ნაწილი უკვე დაიხარჯა სხვადასხვა ინფრასტრუქტურულ პროექტებში. ნაწილიც ახლა იხარჯება და ნაწილიც 2012-2013 წლებში დაიხარჯება.
ფინანსთა მინისტრი ამბობს, რომ 4,5 მილიარდიდან 4 მილიარდი უკვე დაკონტრაქტებულია, საიდანაც 2 მლრდ უკვე ათვისებულია და დანარჩენი თანხის ათვისებაც უახლოეს წლებში იგეგმება.
ბაინდურაშვილის გამარტებით, მთავრობამ ინტენსიურად იმუშავა დონორებთან და საბოლოოდ ქვეყანა 4,5 მილიარდის ნაცვლად 5 მილიარდს მიიღებს.
პრემიერ-მინისტრი ამბობს, რომ თანხის გაზრდა მსოფლიო ბანკისა და აზიის განვითარების ბანკის მიერ მოხდა. ფაქტობრივად 5 მილიარდიდან 2 მილიარდის დახარჯვა 2008, 2009, 2010 წლებში მოხდა, ხოლო დარჩენილი 3 მილიარდი კი 2011-13 წლებში დაიხარჯება.
შეგახსენებთ, რომ რუსეთ საქართველოს ომის შემდეგ ბრიუსელში დონორთა კონფერენცია გაიმართა, სადაც საქართველომ დონორებისგან 4,5 მილიარდი დოლარის გამოყოფის პირობა მიიღო.
