ლიბიაში დაკავებული ქართული დროშის ქვეშ მცურავი გემის მეზღვაურებმა სამშობლოში დაბრუნების შეთავაზებაზე საქართველოს ხელისუფლებას უარი უთხრეს. ამის შესახებ დღეს გამართულ ტრადიციულ პრესკონფერენციაზე საქართველოს საგარეო საქმეთა მინისტრის მოადგილე ნინო კალანდაძემ განაცხადა და აქვე განმარტა, რომ მათ გემის დატოვება თავად არ ისურვეს.
"ჩვენ, ლიბიაში სიტუაციის არევამდე ქვეყის ხელისუფლებასთან თანამშომლობის საფუძველზე, შევთავაზეთ ჩვენს მოქალაქეებს საქართველოში გადმოყვანა, თუმცა მათ ამაზე ნებაყოფლობით უარი განაცხადეს და გემის დატოვება იმ ეტაპზე არ ისურვეს", - განაცხადა კალანდაძემ.
მისივე თქმით, მიუხედავად ამისა, ლიბიაში არსებული რთული ვითარებიდან გამომდინარე, ოფიციალური თბილისი კვლავ ჩაერთო მეზღვაურების სამშობლოში დაბრუნების საკითხის მოგვარებაში და აღნიშნულის გამო მოლაპარაკებებს რამდენიმე სახელმწიფოსთან აწარმოებს.
"ჩვენ რამდენიმე სახელმწიფოსთან ვთანამშრომლობთ, მათ შორის ბრიტანეთთან, საფრანგეთთან, ჰოლანდიასთან, რომლებსაც აქვთ რესურსი და შესაძლებლობა საკუთარი მოქალაქეები გადმოიყვანონ და იმედი გვაქვს, რომ მათი დახმარებით შევძლებთ ჩვენი მოქალაქეების სამშობლოში დაბრუნებასაც", - დასძინა კალანდაძემ.
შეგახსენებთ, რომ ქართული დროშის ქვეშ მცურავი გემი, რომლის მფლობელიც იტალიელია, ლიბანში დაახლოებით ერთი წლის წინ დააკავეს.
