პარლამენტმა პირველი მოსმენით მიიღო "სისხლის სამართლის კოდექსში ცვლილებები", რომელიც მსჯავრდებულის მიერ საზოგადოებრივი სასარგებლო შრომის შესრულებას გულისხმობს.
აღნიშნული კანონპროექტი 24 თებერვალს ადამიანის უფლებათა დაცვისა და იურიდიულ საკითხთა კომიტეტების გაერთიანებულ სხდომაზე სასჯელაღსრულების, პრობაციის და იურიდიული დახმარების მინისტრმა ხათუნა კალმახელიძემ და იუსტიციის მინისტრის მოადგილემ გიორგი ვაშაძემ წარადგინეს.
მათი ინფორმაციით, სასამართლოს პირს საზოგადოებრივი სასარგებლო შრომის ოდენობას შეუფარდებს, რომლის ზედა ზღვარი 800 საათს წარმოადგენს, ხოლო სამუშაოს სახეს და საათების გადანაწილებას პრობაციის ბიურო განსაზღვრავს.
კანონპროექტის თანახმად, პრობაციის ბიუროს კოორდინატორი შეაფასებს პირის გონებრივ და ფიზიკურ შესაძლებლობებს, როს შემდეგაც მოხდება სამუშაოს სახეობის შერჩევა.
თბილისში საზოგადოებრივი სასარგებლო შრომისთვის წლის ბოლომდე 500 სამუშაო ადგილი შეიქმნება. ამ ეტაპზე საზოგადოებისთვის სასარგებლო სამუშაოს ადგილები ძირითადად გასუფთავებისა და გამწვანების სფეროებშია მოძიებული.
მინისტრის თქმით, იმ შემთხვევაში, თუ პირს ქალაქგარეთ მოუწევს სამუშაოს შესრულება, მგზავრობის და კვების ხარჯს სამინისტრო აუნაზღაურებს, ასევე კვების ხარჯები ანაზღაურდება იმ შემთხვევაში, თუ პირს დღეში 8-საათიანი სამუშაოს შესრულება დაეკისრება.
აღნიშნული პილოტურ პროექტს წარმოადგენს, რომელიც თავდაპირველად თბილისში განხორცილდება, ხოლო მომავალში საქართველოს ყველა რეგიონში ამოქმედდება.