აშშ-ის პრეზიდენტის, დონალდ ტრამპის განცხადებით, ევროპული ქვეყნებისთვის ამერიკული შეიარაღების მიყიდვა შეერთებულ შტატებს მნიშვნელოვან შემოსავალს აძლევს.
ამის შესახებ ტრამპმა Fox News-თან ინტერვიუში ისაუბრა.
მისი თქმით, აშშ ევროპულ ქვეყნებს სამხედრო აღჭურვილობაზე ფასდაკლებას არ სთავაზობს, ხოლო ევროპელი პარტნიორები შეძენილი შეიარაღების დიდ ნაწილს უკრაინას გადასცემენ.
„ვფიქრობ, ისინი ძირითადად უკრაინას გადასცემენ. ჩვენ კი იარაღს ვყიდით. სრულ ფასს ვიღებთ, ფასდაკლებებს არ ვაკეთებთ. შეიძლება ითქვას, რომ ამით დიდ ფულს ვშოულობთ. ეს ჩემთვის სულერთია. მე ეს არ მინდა“, - განაცხადა ტრამპმა.
ამასთან, აშშ-ის პრეზიდენტის თქმით, რუსეთის ომი უკრაინის წინააღმდეგ შეერთებულ შტატებზე გავლენას არ ახდენს.
„ეს ჩვენზე გავლენას არ ახდენს. სინამდვილეში, შეიძლება ითქვას, რომ ამაში სრულ ფასს ვიღებთ. ფასდაკლებებს არ ვაკეთებთ. ასე რომ, შეიძლება ითქვას, ამით საკმაოდ კარგ ფულს ვშოულობთ“, - აღნიშნა ტრამპმა.