"გვჯერა, რომ რუსეთთან ურთიერთობის გამოსწორება შესაძლებელია, ჩვენ საერთო ინტერესები გვაქვს _ იქნება ეს ავღანეთი, თუ ბირთვული იარაღის შემცირება", _ განაცხადა თბილისში ვიზიტად მყოფმა აშშ-ის სახელმწიფო მდივნის მოადგილე ჯეიმს სტაინბერგმა ჟურნალისტის შეკითხვაზე, აშშ-ისთვის გარკვეულ რეგიონებში სტაბილურობის შენარჩუნება უფრო მნიშვნელოვანია თუ დემოკრატიის მხარდაჭერა.
"ვფიქრობ, ნათლად აღვწერეთ რუსეთთან ურთიერთობის "გადატვირთვის" ხასიათი. ამ საკითხებში მნიშვნელოვან პროგრესს მივაღწიეთ. თუმცა ეს იმად არ დაგვჯდომია, რომ უარი გვეთქვა, გამოგვეხატა ჩვენი შეშფოთება ამ ქვეყანაში ადამიანის უფლებებთან და სასამართლო პროცედურებთან დაკავშირებით. აზრი გამოვთქვით ხოდორკოვსკის სასამართლო პროცესის, რუსეთში ჟურნალისტების მდგომარეობის, ნემცოვის დაკავების ფაქტის შესახებ", _ აღნიშნა სტაინბერგმა.
სტაინბერგის თქმით, გადატვირთვის არსი საერთო ინტერესებზე უარის თქმას სულაც არ გულისხმობს.
"გადატვირთვას არ დავუმუნჯებივართ და ჩვენი დამოკიდებულება არ შეუცვლია არც ამ და არც სხვა პრინციპულ საკითხზე. არავითარ შემთხვევაში არ უნდა შევალამაზოთ და არ უნდა უგულებელვყოთ განსხვავებები. ამის ყველაზე ცხადი მაგალითი თქვენ ხართ. ჩვენ ძალიან ნათლად გამოვხატავთ რუსეთისგან განსხვავებულ აზრს საქართველოსთან დაკავშირებით", _ აცხადებს აშშ-ის სახელმწიფო მდივნის მოადგილე.
შეგახსენებთ, სახელმწიფო მდივნის მოადგილის სტატუსით, ჯეიმს სტაინბერგის ეს უკვე მესამე ვიზიტია საქართველოში. ჩვენს ქვეყანას იგი სომხეთის შემდეგ ეწვია, რის შემდეგაც აზერბაიჯანში გაემგზავრა.
