დეპუტატი გურამ ჩახვაძე ენერგეტიკისა და ბუნებრივი რესურსების სამინისტროს სახელის შეცვლის ინიციატივით გამოდის. როგორც პლენარულ სხდომაზე ჩახვაძემ აღნიშნა, ენერგეტიკის არსებობა თუ პრობლემას წამოადგენს, მაშინ შეიძლება სამინისტროს, ენერგეტიკისა და ბუნებრივი რესურსების სამინისტროს ნაცვლად, მხოლოდ ბუნებრივი რესურსების სამინისტრო ეწოდოს.
"თუ რამე რაციონალური, გონივრულია და სწორ პოლიტიკასთან გვაქვს საქმე, მთავრობის შემოტანილი იქნება თუ ოპოზიციის, მხარი უნდა დავუჭიროთ. ამ ენერგეტიკამ და ბუნებრივმა რესურსებმა თუ გამოიწვია გაუგებრობა, მაშინ დავარქვათ ბუნებრივი რესურსების სამინისტრო და მორჩება კამათი", - აღნიშნა ჩახვაძემ.
მისი შეფასებით, ის, რაც დღემდე ხდებოდა, მართებული არ იყო, საქმე ეხებოდა სახელმწიფო მართვის არაეფექტურ სისტემას და ახლა მდგომარეობის გამოსწორება ხდება, რაც მისასალმებელია.
"საფრთხე იქნებოდა მაშინ, თუ უარს ვიტყოდით ამ სამინისტროზე. რადგან აქ რჩება სამინისტრო, ყველაფერი რიგზეა და პრობლემა არ გვექნება არც ევროკავშირთან და არც ცივილიზებულ სამყაროსთან, რომელიც მოითხოვს ასეთი სტრუქტურების არსებობას", - აღნიშნა ჩახვაძემ.
მისი შეფასებით, არ შეიძლება გარემოს დაცვის სამინისტროს ეკონომიკური საქმიანობაც შეეთავსებინა და ახალა მისი გამიჯვნა ხდება, რაც ნორმალურია.
