სოხუმის სანაპიროზე მდებარე პატარა კაფეში, რომელსაც "უ აკოპა" ჰქვია და მას სოხუმელები "ბრეხალოვკის" სახელითაც მოიხსენებენ, ხშირად იკრიბებიან ყავის დასალევად და ქვეყანაზე მიმდინარე მოვლენების განსახილველად. სხვათა შორის სწორედ ამ ადგილას დააგემოვნა "სოხუმური" ყავა რუსეთის პრეზიდენტმა დიმიტრი მედვედევმა სოხუმში ყოფნისას. აფხაზეთში გამომავალ პრესაშიც არც თუ იშვიათად კეთდება რეპორტაჟები ამ ადგილიდან.
ბოლო დროს, აქტიურად განსახილველი თემა აფხაზეთში დარჩენილი მოსახლეობისათვის საქართველოს პრეზიდენტის მიერ "პირველი კავკასიური არხით" გაკეთებული განცხადებები იყო. გაზეთი "ეხო აბხაზიი" აღნიშნულ საუბრებს ვრცელ რეპორტაჟს უძღვნის, რომელიც სწორედ ამ "ბრეხალოვკაში" შეკრებილი ადამიანების საუბრებს ეძღვნება.
"როდესაც ისინი იქ რუსეთს ოკუპანტს უწოდებენ ჩვენ აქ ვიცინით, არა და რამდენს ჩაუბეჭდეს უკვე ეს თავში მთელს მსოფლიოში. საინტერესოა, როდესაც ელცინი ომის შემდეგ (1992-1993 წწ. ქართულ-აფხაზური კონფლიქტი) დენს გვითიშავდა და ბლოკადას გვიწყობდა იმისათვის, რომ უკან საქართველოში დავებრუნებინეთ ეს ოკუპაცია იყო? ომის დროსაც რა რუსეთი მათ არ ეხმარებოდა?", _ აცხადებს ქართულ-აფხაზური კონფლიქტის მონაწილე აფხაზი ვეტერანი და აგრძელებს: "მე და სააკაშვილი ტოლები ვართ, მაგრამ ის 92 წლის სექტემბერში კიევში ლექციებზე დადიოდა, მაშინ როდესაც მე გუმისთაზე ქართულ ტანკებს ვაჩერებდი".
"ხომ ამბობს ჩვენი მიწები ბარბაროსებმა მიიტაცესო? საინტერესოა, ვის გულისხმობს? ჩვენ აფხაზებმა დავიპყარით აფხაზეთი?", _ დაინტერესდა ვეტერანი, რომელსაც თანამოსაუბრეებმა პუნქტობრივად გადასცეს თუ რაზე საუბრობდა საქართველოს პრეზიდენტი პირდაპირ ეთერში.
"მხოლოდ ერთი რამე ვერ გავიგე - სააკაშვილმა აფხაზეთს აღთქმული მიწა უწოდა და ქართველობას აფხაზეთში ჩაყვანას, როგორც მოსე, ისე დაჰპირდა, რა ქართველები ახლა ვინმეს ტყვეობაში იმყოფებიან? ", _ კითხვა დასვა საუბარში ჩართულმა კიდევ ერთმა ადამიანმა და ყურადღება სრულიად საქართველოს პატრიარქის ილია II მიერ გაკეთებულ განცხადებაზე გაამახვილა, რომელშიც საქართველოს პატრიარქმა "ბი-ბი-სის" რუსული რედაქციისათვის მიცემულ ინტერვიუში ბრძანა, რომ იგი უახლოეს მომავალში აფხაზეთში, თავის სამწყსოს მონახულებასა და ჩასვლას გეგმავდა ცხუმ-აფხაზეთის მიტროპოლიტის რანგში.
"ვუყურეთ გუშინ ტელევიზიით მამა ბესარიონს (სეპარატისტული აფხაზეთის ე.წ. ეპარქიის ხელმძღვანელი ბესარიონ აპლია) რა რეაქცია ჰქონდა საქართველოს პატრიარქის განცხადებებზე: მან რა ვინმესთან შეათანხმა, რომ ჩამოსვლას აპირებს? და ვინ აპირებს აქ მის შემოშვებას", _ განუცხადებია აპლიას და აღუნიშნავს, რომ "დაახლოებით ორი წლის წინათაც საქართველოს პატრიარქი იგივე შინაარსის განცხადებებს აკეთებდა".
"და მერე რა იყო" - გაგრძელდა საუბარი კაფეში - "არაფერი, ყველამ დაივიწყა ამის შესახებ, ალბათ თვითონ მანაც. უწმინდესს ხომ ახლახანს 79 წელი შეუსრულდა. უმჯობესია, ალბათ უკვე სულზე იფიქრო და არა პოლიტიკაში შეძვრე", _ გაკეთდა დასკვნა ფინჯან ყავაზე სოხუმში.
"მას ხომ არ დაავიწყდა, ომის წინ მის ავტომობილს ლიხნის გადასახვევთან აფხაზების ჯგუფმა, ფსოუზე პროვოკაციული მგზავრობის შემდეგ ალყა რომ შემოარტყა?", _ დაისვა კითხვა.
"პირიქით, ალბათ ვერაფრით ვერ ივიწყებს", _ იყო პასუხი...
სოხუმის სანაპიროზე, ფინჯან ყავაზე კიდევ დიდხანს საუბრობდნენ ქართულ პოლიტიკაზე..
"ოჰ მიშა, მიშა... საქმე მხოლოდ მასში კი არ არის, საქმე იმაშია, რომ საქართველოში უამრავ ადამიანს მოსწონს, რასაც ის ლაპარაკობს", _ ციტირებულია რეპორტაჟის ბოლოს კაფეში მსხდომი ერთ-ერთი მოსაუბრის სიტყვები.
