ფაქტობრივად, ჩვენ შევძელით რუსეთის სამხრეთის ბლოკადა, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
უკრაინის პრეზიდენტის თქმით, უმაღლესი მთავარსარდლის შტაბის სხდომაზე განისაზღვრა სლავიანსკისა და კონსტანტინოვსკის რაიონების გაძლიერების ნაბიჯები და ზომები.
ზელენსკიმ მადლობა გადაუხადა უკრაინელ სამხედროებს, რომლებიც რუს ოკუპანტებს ანადგურებენ, რუსულ იერიშებს იგერიებენ და მოწინააღმდეგის მცირე ჯგუფების უკრაინის პოზიციებში „შეღწევას“ ეწინააღმდეგებიან.
მისი თქმით, აგვისტოში, სულ მცირე 30 ათასი ოკუპანტი განადგურდება.
უკრაინის პრეზიდენტის განცხადებით, შტაბის სხდომაზე ასევე განიხილეს უკრაინის არმიის დრონებითა და სხვა ტექნოლოგიური საშუალებებით უზრუნველყოფა და თავდაცვისთვის საჭირო დაფინანსების საკითხები.
ასევე, უკრაინის პრეზიდენტმა ხაზი გაუსვა, რომ უკრაინამ წელს ბევრად უფრო ტექნოლოგიურ თავდაცვაზე გადასვლა შეძლო.
„შორ მანძილზე მოქმედი სანქციების გეგმა სრულდება, სულ უფრო იზრდება ჩვენი დარტყმებიც საშუალო დისტანციებზე მდებარე სამიზნეებზე. ფაქტობრივად, ჩვენ შევძელით რუსეთის სამხრეთის ბლოკადადა და ამ სტრატეგიულ ოპერაციას ვაფართოებთ - სრულიად სამართლიანად ვაფართოებთ, ჩვენი პორტებისა და ქალაქების წინააღმდეგ რუსეთის მიერ განხორციელებული დარტყმების საპასუხოდ“, - განაცხადა ზელენსკიმ.
მისი თქმით, აუცილებელია რუსეთის საზოგადოებაზე ზეწოლა, რათა მან გააცნობიეროს, რომ ომი უნდა დასრულდეს.
„ჩვენი სანქციები რუსეთის ნავთობგადამამუშავებელი ქარხნების, რუსეთის ნავთობის სფეროს სხვა ობიექტების წინააღმდეგ, ჩვენი დარტყმები რუსეთის სამხედრო ლოგისტიკაზე, ჩვენი ოპერაცია შავი და აზოვის ზღვების აკვატორიაში - ეს ყველაფერი რუსეთის საომარი პოტენციალის შეზღუდვას ემსახურება. მნიშვნელოვანია, ეს მიმართულება უფრო აქტიური პოლიტიკური და სამართლებრივი ნაბიჯებითაც გავაგრძელოთ“, - აღნიშნა უკრაინის პრეზიდენტმა.
