საკუთარი ბალისტიკური შესაძლებლობების განვითარება და ახალი ანტიბალისტიკური სისტემის შექმნა ისეთი ამოცანაა, რომლის შესრულებაც მსოფლიოში მხოლოდ რამდენიმე ქვეყანამ შეძლო, - ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.
მისი განცხადებით, ევროპას სჭირდება ერთიანი და ნამდვილად ფართომასშტაბიანი შესაძლებლობა, რათა ეფექტიანად დაიცვას თავი ნებისმიერი ბალისტიკური საფრთხისგან. მისივე თქმით, უკრაინა მხარს უჭერს და მოელის, რომ ანტიბალისტიკურ კოალიციას უფრო მეტი პარტნიორი ქვეყანა შეუერთდება.
"დღეს გავმართე შეხვედრა, რომელიც ჩვენი ბალისტიკური შესაძლებლობების განვითარებასა და FREYJA-ს ანტიბალისტიკური სარაკეტო პროგრამის განხორციელების მიმდინარეობას მიეძღვნა. პროცესში ჩართულმა უწყებებმა წარმოადგინეს ანგარიში მიმდინარე საჭიროებებისა და უკვე შესრულებული ეტაპების შესახებ.
ჩვენ შევადგინეთ სამუშაო გრაფიკი და განვსაზღვრეთ პასუხისმგებელი პირები იმ მიმართულებებისთვის, რომელთა განხორციელებაც უნდა დაჩქარდეს. ამ პროცესში ჩართული არიან უკრაინის ეროვნული უსაფრთხოებისა და თავდაცვის საბჭო, პრემიერ-მინისტრი და თავდაცვის სამინისტრო, საგარეო დაზვერვის სამსახური, უკრაინის შეიარაღებული ძალების საჰაერო ძალების სარდლობა, Brave1-ის გუნდი და უკრაინის თავდაცვის ინდუსტრიის ყველაზე მაღალტექნოლოგიური ჯგუფები.
საკუთარი ბალისტიკური შესაძლებლობების განვითარება და ახალი ანტიბალისტიკური სისტემის შექმნა ისეთი ამოცანაა, რომლის შესრულებაც მსოფლიოში მხოლოდ რამდენიმე ქვეყანამ შეძლო. უკრაინას ამის შესაძლებლობა აქვს. უკრაინელებს აქვთ საჭირო სამეცნიერო ბაზა და გამოცდილება. ასევე შეგვიძლია ვთქვათ, რომ ჩვენი შეიარაღების მწარმოებლებმაც უკვე მიაღწიეს აუცილებელ დონეს. ველოდებით, რომ უკრაინა საჭირო შედეგებს 2026–2027 წლებში მიაღწევს.
შეხვედრაზე განვიხილეთ მთავარი გამოწვევებიც - კრიტიკულად მნიშვნელოვანი კომპონენტების ხელმისაწვდომობა, პარტნიორებთან ტექნოლოგიური თანამშრომლობის გაღრმავება და წარმოების ლოკალიზაცია.
მადლობას ვუხდი ყველას, ვინც ყველა აღებულ ვალდებულებას დროულად ასრულებს. ასევე მადლობელი ვარ ჩვენი პარტნიორების, რომლებიც გვეხმარებიან და უკვე შეუერთდნენ ჩვენს მთავარ თავდაცვით პროგრამებს. FREYJA წინ მიიწევს და ეს ძალიან მნიშვნელოვანია.
ევროპას სჭირდება ერთიანი და ნამდვილად ფართომასშტაბიანი შესაძლებლობა, რათა ეფექტიანად დაიცვას თავი ნებისმიერი ბალისტიკური საფრთხისგან. ჩვენ მხარს ვუჭერთ და მოველით, რომ ანტიბალისტიკურ კოალიციას უფრო მეტი პარტნიორი ქვეყანა შეუერთდება", - წერს ზელენსკი.
