მეხუთე სამშობიარო სახლიდან გათავისუფლებული თანამშრომლების შესახებ თბილისის საკრებულოს ჯანდაცვის კომიტეტის სხდომაზე ისაუბრეს.
განხილვას სამსახურიდან დათხოვნილი 15 ექიმიც ესწრებოდა. საკითხის დეტალურად შესწავლის მიზნით ინგა გრიგოლია საკრებულოში სამშობიარო სახლის ხელმძღვანელის მიწვევას მოითხოვს.
გრიგოლიას თქმით, "ქრისტიან-დემოკრატები" მიაღწევენ, რომ ამ ხალხმა პასუხი მიიღოს. გარდა ამისა, მათი უფლებების დაცვას სასამართლოს გზითაც შეეცდებიან.
"შევხვდებით ნებისმიერ წარმომადგენელს, ეს იქნება ჯანდაცვისა თუ ეკონომიკის სამინისტროები ან თუნდაც, კონკრეტულად მეხუთე სამშობიაროს ხელმძღვანელობა", _ აცხადებს გრიგოლია.
გათავისუფლებული თანამშრომლები კი აცხადებენ, რომ მინისტრთან შეხვედრის მიზნით მათ განცხადება ჯანდაცვის სამინისტროშიც შეიტანეს. თუმცა პასუხი არ მიუღიათ.
საკრებულოს წევრის ზაზა სინაურიძის თქმით, იგი, როგორც საკრებულოს დეპუტატი, იმ პირთა გვერდით დადგება, ვის მიმართაც დარღვევა დაფიქსირდება.
"თუ აქ იურიდიული დარღვევა არ ჩანს, მაშინ ჩვენი კომპეტენციაა, რეკომენდაცია მივცეთ, რათა შემდგომში სწორი მექანიზმი შემუშავდეს ექიმების სამსახურში მიღება-გათავისუფლების თაობაზე", _ აღნიშნავს სინაურიძე.
