რუსეთის მოსახლეობის უდიდესი ნაწილი მხარს არ დაუჭერს მოქმედი პრემიერ-მინისტრის ვლადიმერ პუტინის გადაწყვეტილებას, იმ შემთხვევაში თუკი იგი 2012 წელს საპრეზიდენტო არჩევნებში მონაწილეობას გადაწყვეტს. ეს განცხადება მიხეილ ხოდორკოვსკიმ "კომერსანტ-ვლასტისათვის" მიცემულ ინტერვიუში გააკეთა. მისივე თქმით, ვლადიმერ პუტინის მონაწილეობა არჩევნებში იქნება დემონსტრაციული ნაბიჯი წარსულისაკენ - "იმ შემთხვევაში თუკი პუტინი არჩევნებში მონაწილეობას მიიღებს ეს იმას ნიშნავს, რომ ხელისუფლების მშვიდად გადაბარების მცდელობა ვერ განხორციელდა. მისი განმეორება, კი მშვიდ რეჟიმში პრაქტიკულად შეუძლებელი იქნება", _ განაცხადა ხოდორკოვსკიმ.
ხოდორკოვსკი ასევე აღნიშნავს, რომ "ხანდახან სიმპატიითაც" არის განწყობილი მოქმედი პრეზიდენტის დიმიტრი მედვედევის მიმართ. მისი აზრით, მედვედევი რუსეთისათვის არის შანსი ნორმალური განვითარების ტრაექტორიაზე გავიდეს.
ქვეყნის მომავალზე საუბრისას, ხოდორკოვსკიმ აღნიშნა, რომ სახელმწიფოს რომელსაც უკეთესი მომავლის იმედი არ აქვს, სიცოცხლისაკენ შემოტრიალება მხოლოდ რევოლუციური გზით შეიძლება. ამასთან ერთად "იუკოსის" ყოფილმა ხელმძღვანელმა აღნიშნა, რომ თავად ევოლუციური განვითარების მომხრეა.
ამასთან ერთად, ხოდორკოვსკიმ გაზეთთან საუბარში, მის წინააღმდეგ აღძრული მეორე სისხლის სამართლის საქმესთან დაკავშირებითაც გააკეთა კომენტარი და აღნიშნა, რომ განაჩენი მოსამართლე ვიქტორ დანილკინს არ დაუწერია, როგორც ამას კანონი მოითხოვდა, არამედ სხვა ადამიანებმა დაწერეს, ამასთან ერთად ტექსტში დაშვებული იყო იურიდიული ხასიათის შეცდომები. თავად მოსამართლე დანილკინზე კი ხოდორკოვსკიმ განაცხადა, რომ იგი "ზომიერად სინდისიანი და ზომიერად პროფესიონალია", რომელიც "მოტეხეს". ვერსიები იმის შესახებ, თუ ვინ დაწერა განაჩენი ხოდორკოვსკის არ გამოუთქვამს.