საფრანგეთში დაკავებული საქართველოს მოქალაქეებიდან 2 გათავისუფლებულია.
ამის შესახებ ჟურნალისტებს ინფორმაცია დღეს გამართულ ტრადიციულ ბრიფინგზე საქართველოს საგარეო საქმეთა მინისტრის მოადგილე ნინო კალანდაძემ მიაწოდა.
გარდა ამისა, მისივე განმარტებით, იგეგმება 9 ქართველის დაკითხვა, ერთზე კი სამართალდამცველმა ორგანოებმა ძებნა გამოაცხადეს.
"საფრანგეთში დაკავებულ საქართველოს მოქალაქეებთან დაკავშირებით შეზღუდული ინფორმაცია გვაქვს. ვიცით მხოლოდ ის, რომ დაკითხვის პროცესი მიმდინარეობს. იგეგმება კიდევ 9 ქართველის დაკითხვა, ერთზე ძებნა გამოცხადა, ორი კი დაკითხვის შემდეგ გაათავისუფლეს. დაკავებულთა ვინაობის შესახებ ინფორმაცია ამ დრომდე არ გვაქვს, რადგან საფრანგეთის მხარე ფაქტს სახაროს არ ხდის", - განმარტა კალანდაძემ.
რაც შეეხება დაკავების მიზეზს, მინისტრის მოადგილის თქმით, ცნობილია მხოლოდ ის, რომ საქართველოს მოქალაქეების აყვანა ლუქსემბურგში შეძენილი ნაწარმის საფრანგეთში კონტრაბანდული გზით შეტანას უკავშირდება.
შეგახსენებთ, რომ საფრანგეთის სამართალდამცავი ორგანოების მიერ საქართველოს მოქალაქეების დაკავების შესახებ ინფორმაცია მედიასაშუალებებით, გასულ კვირას გავცელდა.
