საქართველოს საგარეო საქმეთა სამინისტრო აფხაზეთში პირველი ამერიკული ინვესტიციის შესაძლო განხორციელების შესახებ ინფორმაციას არ ფლობს.
"ეს ინფორმაცია დაზუსტებას საჭიროებს. მისი ნამდვილობა უნდა გადავამოწმოთ, რადგან ხშირად ყოფილა პრაქტიკაში ისეთი შემთხვევები, როცა მსგავსი ინფორმაცია გავრცელებულა, თუმცა შემდეგ არ დადასტურებულა", - განაცხადა საგარეო უწყების ხელძღვანელის მოადგილე ნინო კალანდაძემ დღეს გამართულ ტრადიციულ პრესკონფერენციაზე.
მისივე განმარტებით, საქართველოს აფხაზეთისა და ცხინვალის ეკონომიკურად განვითარება სურს, თუმცა ეს "ჩვენი წესების" დაცვით უნდა მოხდეს.
"ჩვენი პოლიტიკის ნაწილია საქართველოს, მათ შორის, ოკუპირებული რეგიონების ეკონომიკური განვითარება. შესაბამისად, ჩვენი ინტერესია, რომ მათი განვითარება მოხდეს, მაგრამ ჩვენ გვაქვს ჩვენი წესები, არსებობს ქართული კანონმდებლობა და პირველ რიგში, "ოკუპირებული ტერიტორიების შესახებ" კანონი, რომლის სრული დაცვითაც უნდა განხორციელდეს ამ ტერიტორიებზე ნებისიერი ინვესტიცია", - განმარტა კალანდაძემ.
მინისტრის მოადგილის თქმით, იმ შემთხვევში, თუ ამერიკული უძრავი ქონების დეველოპერის მხრიდან ოკუპირებულ აფხაზეთში ინვესტიციის ჩადების თაობაზე დაინტერესება მართლაც იარსებებს, მათ შესაძლებლობა ექნებათ ეს საქართველოს მთავრობის ნებართვით განახორციელოს", თუმცა, თუ მცდელობა იქნება, რომ ინვესტიციები ცენტრალური ხელისუფლების გვერდის ავლით ჩაიდოს, მასზე საგარეო საქმეთა სამინისტროს შესაბამისი რეაგირება ექნება.
"ჩვენ ამ ფაქტს აუცილებლად მკაცრდად დავგმობთ", - დასძინა მინისტრის მოადგილემ.
შეგახსენებთ, რომ ამერიკული გამოცემა "ატლანტას" ინფორმაციით, აფხაზეთში პირველი ამერიკული ინვესტიცია ჩაიდება. საუბარია სოხუმში 5-ვარსკვლავიანი სასტუმროს მშენებლობაზე, რითაც უძრავი ქონების დეველოპერ "ბრიუს დელია" დაინტერესებული.
