უკრაინის პრეზიდენტის, ვოლოდიმირ ზელენსკის განცხადებით, დარწმუნებულია, რომ მიხაილო ფედოროვი მის გუნდში დარჩება, თუმცა მათი შემდგომი თანამშრომლობის საბოლოო ფორმატზე მოგვიანებით ისაუბრებენ.
ამის შესახებ პრეზიდენტმა ჟურნალისტებთან გამართულ ბრიფინგზე განაცხადა.
„დარწმუნებული ვარ, რომ ის ჩემს გუნდში დარჩება და ცოტა მოგვიანებით ვისაუბრებთ, როგორი იქნება ეს ფორმატი“, - განაცხადა ზელენსკიმ.
ვოლოდიმირ ზელენსკიმ მიხაილო ფედოროვსა და უკრაინის შეიარაღებული ძალების მთავარსარდალ oლექსანდრ სირსკის შორის დაპირისპირების შესახებაც ისაუბრა და აღნიშნა, რომ მათ კონფლიქტის მოგვარება მის გარეშე არ შეუძლიათ.
„მე მხარეებს პატივს ვცემ. ვიცი მათი დადებითი და უარყოფითი მხარეები. მსურს, რომ მათ უკრაინა გააძლიერონ, მაგრამ რეალობაა ის, რაც არის. ასეთ დროს კი გამოსავალი ან ერთი მხარეა, ან მეორე. ისინი ჩემ გარეშე მაგიდასთან ვერ დასხდებიან“, - აღნიშნა ზელენსკიმ.
მანამდე ფედოროვმა თქვა, რომ მას შემდეგ, რაც გადაწყდა, მისი კანდიდატურა თავდაცვის მინისტრის პოსტზე ხელახლა დასანიშნად არ წარედგინათ, პრეზიდენტთან „ნორმალური საუბარი“ ჰქონდა.
მისი თქმით, ზელენსკიმ მას გუნდში დარჩენა შესთავაზა. ფედოროვმა აღნიშნა, რომ პრეზიდენტმა მას მრჩევლის თანამდებობა შესთავაზა, თუმცა მან ეს წინადადება არ მიიღო.
„მან შემომთავაზა, გავმხდარიყავი მრჩეველი ან სხვა ფორმით დავრჩენილიყავი გუნდში“, - განაცხადა ფედოროვმა.
ფედოროვის თქმით, ზელენსკის ტელეფონით ესაუბრა, თუმცა მისი შემდგომი საქმიანობის საკითხი ცალკე უნდა განიხილონ. მისი განცხადებით, ბოლო შვიდი წლის განმავლობაში ის პრეზიდენტის გუნდში მუშაობდა და იმ სფეროების რეფორმირებით იყო დაკავებული, რომლებიც გარდაქმნას საჭიროებდა.
ფედოროვმა ასევე არ გამორიცხა, რომ მისი მომავალი როლის შესახებ გადაწყვეტილება უკვე მიღებულია ან უახლოეს პერიოდში იქნება მიღებული, თუმცა დეტალები არ დაუკონკრეტებია.
